ગાંધીનગર,તા.16
સોમનાથ ધામ ખાતે ભારતીય સંસ્કૃતિના પુનરુત્થાન સમા ઉજવાયેલા સોમનાથ સ્વાભિમાન પર્વ પછીની પ્રથમ મહાશિવરાત્રિએ ભક્તિ અને સેવાનો અનોખો સુભગ સંયોગ સર્જાયો. દેશભરમાંથી ઉમટી આવેલા લાખો શ્રદ્ધાળુઓ વચ્ચે નિ:શુલ્ક ભોજન પ્રસાદની વ્યાપક વ્યવસ્થાથી “કોઈ ભક્ત ભૂખ્યો ન જાય”નો સંકલ્પ સાકાર બન્યો છે.
પીએમ નરેન્દ્ર મોદીના અધ્યક્ષપણામાં કાર્યરત સોમનાથ ટ્રસ્ટ દ્વારા તાજેતરમાં યોજાયેલા સોમનાથ સ્વાભિમાન પર્વમાં દેશના ખૂણે-ખૂણેથી ભક્તો પહોંચ્યા હતા. વિશેષ ટ્રેન અને બસોની સુવિધા સાથે યાત્રિકોને રેલ્વે સ્ટેશનથી મંદિર સુધી પહોંચાડવાની તેમજ રહેવા-જમવાની વ્યવસ્થા ટ્રસ્ટ દ્વારા ઉદારતાપૂર્વક કરવામાં આવી હતી.1951માં સોમનાથ મંદિરના પુનર્નિર્માણ પછી ભક્તોને ભોજન પ્રસાદ પહોંચાડવાની વ્યવસ્થા એક પડકારરૂપ હતી. આ વર્ષે મંદિરના પુનર્નિર્માણના 75 વર્ષ પૂર્ણ થતા, સ્વાભિમાન પર્વે ભક્તસેવાનું વિશાળ આયોજન કરીને તે પડકારને અવસરમાં ફેરવ્યો. દિવસ-રાત ચાલેલા ભંડારામાં હજારો સેવાભાવી કાર્યકરો જોડાયા અને લાખો યાત્રિકોને પ્રસાદરૂપે ભોજન પૂરું પાડવામાં આવ્યું.
મહાશિવરાત્રિના પાવન પ્રસંગે સીએમ ભૂપેન્દ્ર પટેલની ઉપસ્થિતિમાં સોમનાથ ટ્રસ્ટે ગીર-સોમનાથ જિલ્લા વહીવટી તંત્રને ભંડારાના રાશન ખર્ચ પેટે ₹1.08 કરોડનો ચેક અર્પણ કર્યો. ટ્રસ્ટી જે઼.ડી. પરમાર, સેક્રેટરી યોગેન્દ્ર દેસાઈ અને જનરલ મેનેજર દ્વ્રારા આ ચેક જિલ્લા વહીવટી તંત્રને આપવામાં આવ્યો હતો.
