6નાં મોત, અનેક ઘાયલ , લેબનાનમાં ભયનો માહોલ
મધ્ય પૂર્વમાં વધતી તણાવભરી પરિસ્થિતિ વચ્ચે Lebanonની રાજધાની Beirut પર બુધવારે વહેલી સવારે Israel દ્વારા કરવામાં આવેલા હવાઈ હુમલાઓમાં ઓછામાં ઓછા 6 લોકોના મોત થયા હોવાનું લેબનાનના અધિકારીઓએ જણાવ્યું છે. આ હુમલામાં 24થી વધુ લોકો ઘાયલ થયા છે અને કેટલાકની હાલત ગંભીર હોવાનું કહેવાઈ રહ્યું છે.
લેબનાનની નેશનલ ન્યૂઝ એજન્સી મુજબ, મધ્ય બૈરુતના ઝુકાક અલ-બ્લાત વિસ્તારમાં આવેલા એક રહેણાંક મકાન પર અચાનક હુમલો કરવામાં આવ્યો હતો. આ વિસ્તાર સરકારી કચેરીઓ અને અનેક દૂતાવાસોની નજીક આવેલો છે. ખાસ વાત એ છે કે આ હુમલા પહેલા કોઈપણ પ્રકારની ચેતવણી આપવામાં આવી નહોતી, જેના કારણે સ્થાનિકોમાં ભારે ભય અને ગભરાટ ફેલાઈ ગયો હતો.
આ ઉપરાંત, બસ્તા વિસ્તારમાં પણ બે મકાનોને નિશાન બનાવી હુમલા કરવામાં આવ્યા હતા. ઘટનાસ્થળે બચાવ દળોએ તાત્કાલિક કામગીરી શરૂ કરી હતી, જ્યાં મકાનના ભાગો તૂટી પડ્યા હોવાના દૃશ્યો સામે આવ્યા હતા. આરોગ્ય મંત્રાલયે જણાવ્યું કે કેટલાક મૃતદેહોની ઓળખ માટે DNA ટેસ્ટ કરવાની જરૂર પડશે, કારણ કે વિસ્ફોટ ખૂબ જ પ્રચંડ હતો. પછીથી ઇઝરાયલી સેનાએ બશૌરા વિસ્તારમાં એક બિલ્ડિંગ માટે ખાલી કરવાની ચેતવણી જાહેર કરી હતી, અને થોડા જ સમયમાં ત્યાં ફરી વિસ્ફોટ થયો હતો. આ વિસ્તાર બૈરુતના વ્યાપારી કેન્દ્ર નજીક આવેલો હોવાથી મોટી સંખ્યામાં લોકો ત્યાં રહે છે અને રોજિંદી ગતિવિધિઓ ચાલે છે.
આ હુમલાઓ વચ્ચે દક્ષિણ લેબનાનમાં પણ ઇઝરાયલે Hezbollahના ઠેકાણાઓ પર તીવ્ર હુમલા શરૂ કર્યા છે. ટાયર શહેર અને આસપાસના વિસ્તારોમાં લોકોમાં ભયનો માહોલ છે અને હજારો લોકો સ્થળાંતર કરવા મજબૂર બન્યા છે. ઉલ્લેખનીય છે કે શરૂ થયેલા આ સંઘર્ષમાં અત્યાર સુધી 900થી વધુ લોકોનાં મોત થયા છે અને લાખો લોકો પોતાના ઘરો છોડીને સલામત સ્થળે આશરો લઈ રહ્યા છે. હાલની પરિસ્થિતિ જોતા મધ્ય પૂર્વમાં તણાવ વધુ વધવાની શક્યતા વ્યક્ત કરવામાં આવી રહી છે.
