ગાંધીનગર,તા.9: ગુજરાત સરકારે પોતાની માલિકીના વિમાન અને હેલિકોપ્ટરને સંચાલિત રાખવા માટે છેલ્લા બે વર્ષમાં કુલ ₹86,33,55,531નો ખર્ચ કર્યો હોવાનું વિધાનસભામાં ખુલ્યું છે. આ ખર્ચમાં પાયલોટ અને અન્ય સ્ટાફના પગાર ઉપરાંત વિમાન અને હેલિકોપ્ટરની મેન્ટેનન્સ તથા મરામતનો ખર્ચ પણ સમાવેશ થાય છે.
આ વિગતો વિધાનસભામાં કોંગ્રેસના ધારાસભ્ય ઈમરાન ખેડાવાલાએ પૂછેલા પ્રશ્નના જવાબમાં સરકાર દ્વારા રજૂ કરવામાં આવી હતી. મળેલી માહિતી મુજબ રાજ્ય સરકારે છેલ્લા બે વર્ષમાં વિમાન અને હેલિકોપ્ટરના મેન્ટેનન્સ માટે ₹56,66,32,421 ખર્ચ્યા છે.
તે ઉપરાંત વિમાન અને હેલિકોપ્ટર ઉડાડનારા પાયલોટના પગાર પાછળ પણ મોટો ખર્ચ થયો છે. છેલ્લા બે વર્ષ દરમિયાન પાયલોટના પગાર માટે રાજ્ય સરકારે ₹28,08,25,262 ચૂકવ્યા છે. જ્યારે અન્ય સ્ટાફના પગાર માટે ₹1,58,97,848નો ખર્ચ કરવામાં આવ્યો છે.
સરકારી વિમાન અને હેલિકોપ્ટરના સંચાલન પાછળ કરોડો રૂપિયાનો ખર્ચ થવા છતાં છેલ્લા બે વર્ષમાં ટેકનિકલ ક્ષતિને કારણે બે વખત ઉડાન રદ કરવાની ફરજ પડી હોવાનું પણ સામે આવ્યું છે.
આંકડાઓ સામે આવતા સરકારી વિમાન અને હેલિકોપ્ટરના ખર્ચ અંગે ફરી ચર્ચા તેજ બની છે, કારણ કે મેન્ટેનન્સ અને સંચાલન માટે મોટા પાયે ખર્ચ થવા છતાં ટેકનિકલ સમસ્યાઓ પણ નોંધાઈ છે.
