ગરમીની શરૂઆતમાં જ રસ્તાઓને પરસેવો છૂટ્યો, પાલિકાની કામગીરીની પોલ ખુલ્લી પડી
(પ્રતિનિધિ), વડોદરા. તા.7
વડોદરા મહાનગરપાલિકાના ભ્રષ્ટ અને હલકી ગુણવત્તાના કામોનો નમૂનો ઉનાળાની શરૂઆતે જ શહેરના અલકાપુરી વિસ્તારમાં જોવા મળ્યો છે. સૂર્યદેવતાએ હજુ તો આકરા તેવર બતાવવાનું શરૂ કર્યું છે, ત્યાં જ વડોદરાના રસ્તાઓ પીગળીને પ્રવાહી બની રહ્યા છે. અલકાપુરીમાં હોટલ એક્સપ્રેસ પાસેનો ડામરનો રોડ જાણે ‘ગુંદર’ બની ગયો હોય તેમ લોકોના પગરખાં અને વાહનોને પોતાની તરફ ખેંચી રહ્યો છે. આ દ્રશ્યો જોઈને શહેરીજનો પૂછી રહ્યા છે કે, સાહેબ, આ રોડ બનાવ્યો છે કે કોઈને ચોંટાડવાનો ફેવિકોલ ? અલકાપુરી જેવા વિસ્તારમાં, જ્યાં હજારો લોકોની અવરજવર રહે છે, ત્યાં રોડનો ડામર ઉકળવા માંડ્યો છે. રસ્તો એટલો ચુંબકીય બની ગયો છે કે ચાલતા જતા રાહદારીઓના ચંપલ ડામરમાં ફસાઈ જાય છે. લોકોએ પોતાનું સંતુલન જાળવવા માટે ભારે કસરત કરવી પડે છે. ગૃહિણીઓ, નોકરિયાત વર્ગ અને ખાસ કરીને વૃદ્ધો માટે આ માર્ગ પર ચાલવું એક અગ્નિપરીક્ષા સમાન બની ગયું છે. દ્વિચક્રી વાહનચાલકોના ટાયર ડામરની ચીકાશને કારણે સ્લિપ થઈ રહ્યા છે, જે ગંભીર અકસ્માતને ખુલ્લું આમંત્રણ આપી રહ્યા છે. સામાન્ય રીતે ડામરના મિશ્રણમાં જો યોગ્ય તાપમાન અને ગુણવત્તા જાળવવામાં ન આવે તો જ આવી સ્થિતિ સર્જાય છે. ઉનાળાની શરૂઆતમાં જ જો ડામર પીગળવા લાગે, તો ભર ઉનાળે રસ્તાની હાલત શું થશે ? કોન્ટ્રાક્ટરો અને પાલિકાના એન્જિનિયરોની મિલીભગતને કારણે જનતાના ટેક્સના કરોડો રૂપિયા જાણે ડામર બનીને રસ્તા પર વહી રહ્યા હોય તેવો ઘાટ સર્જાયો છે. સ્થાનિકોની એક જ માંગ છે કે વડોદરા મહાનગરપાલિકા કુંભકર્ણની નિદ્રામાંથી જાગે અને અલકાપુરી સહિતના વિસ્તારોમાં જ્યાં પણ ડામર ઉખડી રહ્યો છે કે પીગળી રહ્યો છે, ત્યાં તાત્કાલિક ધોરણે મરામતની કામગીરી શરૂ કરે.
