અમેરિકા-ઇઝરાયલ-ઈરાન યુદ્ધનો પાંચમો દિવસ, 650 અમેરિકી સૈનિકોને નુકસાનનો ઈરાનનો દાવો
પશ્ચિમ એશિયામાં અમેરિકા, ઇઝરાયલ અને ઈરાન વચ્ચે ચાલી રહેલા તણાવભર્યા સંઘર્ષનો આજે પાંચમો દિવસ છે. યુદ્ધની સ્થિતિ દિવસેને દિવસે વધુ ગંભીર બની રહી છે.ઈરાને દાવો કર્યો છે કે દુબઈમાં આવેલા અમેરિકન દૂતાવાસને નિશાન બનાવીને હુમલો કરવામાં આવ્યો હતો. બીજી તરફ ઇઝરાયલે ઈરાનની રાજધાની તેહરાન અને લેબનાનની રાજધાની બેરૂત પર હવાઈ બોમ્બમારો કર્યો હોવાનો અહેવાલ છે, જેના કારણે સમગ્ર વિસ્તારમાં તણાવ વધુ વકર્યો છે.
ઈરાનની સશસ્ત્ર દળોની મહત્વપૂર્ણ એકમ ઇસ્લામિક રેવોલ્યુશનરી ગાર્ડ કોર્પ્સ (IRGC)એ જણાવ્યું છે કે તેના જવાબી હુમલાઓમાં પહેલા બે દિવસ દરમિયાન આશરે 650 અમેરિકી સૈનિકો મોતને ભેટ્યા અથવા ઘાયલ થયા છે.અમેરિકાએ આ આંકડાઓને સ્વીકાર્યા નથી અને તેમને વધારેલા ગણાવ્યા છે,આ દરમિયાન અમેરિકાના રાષ્ટ્રપતિ ડોનાલ્ડ ટ્રમ્પએ મંગળવાર રાત્રે જણાવ્યું હતું કે ઈરાન તરફથી પહેલો હુમલો થવાની શક્યતા હોવાને કારણે અમેરિકી સેનાને ઇઝરાયલ સાથે મળીને કાર્યવાહી કરવાનો આદેશ આપવામાં આવ્યો હતો. તેમના નિવેદન બાદ યુદ્ધ વધુ તેજ બનવાની શક્યતા અંગે ચર્ચાઓ શરૂ થઈ છે.
યુદ્ધ અંગે અમેરિકાના દાવા :અમેરિકાએ આ સૈન્ય કાર્યવાહીનું નામ “એપિક ફ્યુરી” આપ્યું છે. અમેરિકાના દાવા મુજબ આ અભિયાનમાં મોટી સંખ્યામાં સૈન્ય શક્તિનો ઉપયોગ કરવામાં આવ્યો છે.
ઈરાનના 17 જહાજ નષ્ટ કરી દેવાયા, જેમાં એક પનડૂબી પણ સામેલ છે.:આ ઓપરેશનમાં 50,000થી વધુ અમેરિકી સૈનિકો સામેલ છે.લગભગ 200 ફાઇટર જેટ, બે એરક્રાફ્ટ કેરિયર અને બોમ્બર વિમાનો તૈનાત કરવામાં આવ્યા છે.ઈરાનના એર ડિફેન્સ સિસ્ટમ, મિસાઇલ અને ડ્રોનને ભારે નુકસાન પહોંચાડ્યાનો દાવો કરવામાં આવ્યો છે.
વિશ્લેષકોનું માનવું છે કે જો આ સંઘર્ષ વધુ વકરી જશે તો સમગ્ર પશ્ચિમ એશિયામાં મોટું યુદ્ધ ભડકી શકે છે અને વૈશ્વિક તેલ બજાર પર પણ તેની અસર જોવા મળી શકે છે. હાલ વિશ્વના અનેક દેશો પરિસ્થિતિ પર નજર રાખી રહ્યા છે.
