કેન્દ્ર સરકારના તમામ વિભાગોને રિપોર્ટ સોંપવાનો આદેશ
કેન્દ્ર સરકારના તમામ મંત્રાલયો અને વિભાગોમાં સોમવાર, 2 માર્ચે એક અનોખી પ્રવૃત્તિ જોવા મળી હતી , સરકારના અધિકારીઓએ રોજિંદા કામમાંથી સમય કાઢીને એક કલાક સુધી ‘Seva Sankalp Resolution’ નામના ત્રણ પાનાના સંકલ્પનું સમૂહમાં વાંચન કર્યું અને ત્યારબાદ તેના અમલીકરણ અંગે ચર્ચા પણ કરી. સરકારના જણાવ્યા મુજબ આ સંકલ્પ દેશની સેવા, જવાબદારી અને રાષ્ટ્ર નિર્માણ માટેની દિશા દર્શાવે છે.
આ સંકલ્પ ગયા અઠવાડિયે નવા પ્રધાનમંત્રી કાર્યાલય ‘Seva Teerth’ ખાતે યોજાયેલી યુનિયન કેબિનેટની પ્રથમ બેઠકમાં સ્વીકારવામાં આવ્યો હતો. સરકારનું માનવું છે કે આ પહેલ દ્વારા અધિકારીઓમાં ફરજ પ્રત્યેની પ્રતિબદ્ધતા વધુ મજબૂત બનશે અને દેશના લગભગ 1.4 અબજ નાગરિકોની સેવા માટે નવી ઊર્જા મળશે.
કેબિનેટ સચિવાલય દ્વારા તમામ મંત્રાલયો અને વિભાગોને મેમો મોકલીને સૂચના આપવામાં આવી હતી કે 2 માર્ચે અધિકારીઓની બેઠક યોજીને આ સંકલ્પનું વાંચન કરવામાં આવે અને પછી તેના અમલીકરણ માટે શું પગલાં લેવાઈ શકે તેની ચર્ચા કરવામાં આવે. સાથે જ દરેક વિભાગને આ પ્રવૃત્તિ અંગેનો વિગતવાર અહેવાલ મંગળવાર સુધી કેબિનેટ સચિવાલયને મોકલવા કહેવામાં આવ્યું છે.
સામાન્ય રીતે સરકારી અધિકારીઓ દર વર્ષે ભ્રષ્ટાચાર વિરોધી અને વિજિલન્સ સંકલ્પ લેતા હોય છે, પરંતુ આ સંકલ્પ તેની લંબાઈને કારણે ચર્ચામાં રહ્યો. કેટલાક અધિકારીઓએ નામ જાહેર ન કરવાની શરતે જણાવ્યું કે એક કલાક સુધી ચાલેલી આ ચર્ચા દરેક માટે સમયનો શ્રેષ્ઠ ઉપયોગ રહ્યો કે નહીં તે અંગે મિશ્ર અભિપ્રાય જોવા મળ્યો.
તે દરમિયાન, કેટલાક મંત્રાલયો હાલમાં પશ્ચિમ એશિયામાં શરૂ થયેલા સંઘર્ષના પ્રભાવને સંભાળવામાં વ્યસ્ત છે. ખાસ કરીને નાગરિક ઉડ્ડયન મંત્રાલય અને વિદેશ મંત્રાલય માટે આ સમય મહત્વનો ગણાય છે. આ વચ્ચે પ્રધાનમંત્રીએ પણ રવિવારે રાત્રે દિલ્હી પરત ફર્યા બાદ કેબિનેટ કમિટી ઑન સિક્યોરિટીની બેઠક બોલાવી હતી.
સરકાર દ્વારા અપાયેલા સંદેશ મુજબ ‘Seva Sankalp’નો મુખ્ય ઉદ્દેશ ભારતને “Mother of Democracy” તરીકે વધુ ગૌરવપૂર્ણ બનાવવાનો છે. સંકલ્પમાં જણાવાયું છે કે ‘Seva Teerth’ની કલ્પના ફરજ, સેવા અને સમર્પણના સંગમથી બનેલી છે, અને આ કાર્યસ્થળને યાત્રાધામ જેટલું પવિત્ર માનવામાં આવે તેવી ભાવના સાથે કાર્ય કરવાની અપેક્ષા રાખવામાં આવી છે.
