આજે મંગળવાર, 24 ફેબ્રુઆરીના રોજ ભારતીય શેરબજારમાં સવારે માર્કેટ ખુલતાના સાથે ભારે ઘટાડો નોંધાયો હતો અને છેલ્લા બે દિવસથી ચાલતી તેજી પર બ્રેક લાગી હતી. ટ્રેડિંગ દરમિયાન સેન્સેક્સ લગભગ 1,250 પોઈન્ટ તૂટ્યો હતો, જ્યારે નિફ્ટી મહત્વપૂર્ણ 25,400ના સ્તરથી નીચે સરક્યો હતો. આઈટી શેરોમાં જોરદાર વેચવાલી, રૂપિયાની નબળાઈ અને નબળા વૈશ્વિક સંકેતોના કારણે રોકાણકારોના સેન્ટિમેન્ટ પર અસર પડી હતી. બપોરે 1:40 વાગ્યે BSE સેન્સેક્સ 1,221.99 પોઇન્ટ એટલે કે 1.47% ઘટીને 82,072.67 પર ટ્રેડ થઈ રહ્યો હતો, જ્યારે નિફ્ટી 337.55 પોઈન્ટ એટલે કે 1.31% તૂટીને 25,375.45 પર બંધ રહ્યો હતો. નિફ્ટી મિડકેપ 100 અને સ્મોલકેપ 100 ઇન્ડેક્સમાં પણ લગભગ 0.5% સુધીનો ઘટાડો નોંધાયો હતો અને મોટાભાગના સેક્ટોરલ ઇન્ડેક્સ લાલ નિશાનમાં રહ્યા હતા.
આઈટી ક્ષેત્રમાં વિશ્વભરમાં AI સંબંધિત વધતી ચિંતાઓ વચ્ચે ભારે વેચવાલી જોવા મળી હતી. અમેરિકાની AI કંપની દ્વારા ક્લાઉડ કોડિંગ ટૂલ અંગે કરાયેલા દાવાઓને કારણે પરંપરાગત IT કંપનીઓના બિઝનેસ મોડલ પર અસર થવાની આશંકા વધી હતી, જેના કારણે નિફ્ટી IT ઇન્ડેક્સ સવારે લગભગ 3% તૂટ્યો હતો. સાથે જ રૂપિયો પણ નબળો પડ્યો હતો અને શરૂઆતના વેપારમાં 7 પૈસા ઘટીને 90.96 પ્રતિ ડોલર થયો હતો. ડોલરમાં મજબૂતી અને ક્રૂડ ઓઇલના વધતા ભાવથી ચલણ પર દબાણ આવ્યું હતું, જોકે FII ખરીદીના કારણે ઘટાડો થોડોક મર્યાદિત રહ્યો હતો.
વૈશ્વિક સ્તરે પણ નબળા સંકેતો મળ્યા હતા. મોટાભાગના એશિયન બજારો સુસ્ત રહ્યા હતા અને અમેરિકી બજારો પણ નુકસાન સાથે બંધ થયા હતા, જેના કારણે સ્થાનિક બજારમાં દબાણ વધ્યું હતું. બ્રેન્ટ ક્રૂડના ભાવ 1% વધીને 72.13 ડોલર પ્રતિ બેરલ થયા હતા, જે ભારત માટે ફુગાવો અને વેપાર ખાધ અંગે ચિંતા વધારનાર રહ્યા હતા. ઉપરાંત, નિફ્ટી ડેરિવેટિવ કોન્ટ્રાક્ટ્સની સાપ્તાહિક સમાપ્તિને કારણે બજારમાં અસ્થિરતા વધી હતી, કારણ કે વેપારીઓએ તેમની ફ્યુચર્સ અને ઓપ્શન્સ પોઝિશન બંધ કરી અથવા આગળ ધપાવી હતી. ટેકનિકલ રીતે નિફ્ટી અગાઉના સત્રમાં 25,700 ઉપર ટકી શક્યો નહોતો, જે તેજીનો વેગ ઘટવાનો સંકેત આપતો હતો, જોકે નિષ્ણાતોના મતે બજાર સંપૂર્ણ ડાઉનટ્રેન્ડમાં પ્રવેશ્યું નથી અને 25,300 થી 25,840 વચ્ચેની રેન્જ મહત્વપૂર્ણ રહી હતી.
