પ્રતિનિધિ | વડોદરા, તા.19 :
સંસ્કારી નગરી વડોદરાના વિશ્વામિત્રી રેલવે સ્ટેશન પાસે વધુ એક કરુણ ઘટના સામે આવી છે. સુરત ખાતે રહેતા મૂળ ઉત્તરપ્રદેશના એક યુવા દંપતીએ ટ્રેન નીચે પડતું મૂકી આપઘાત કરી લેતાં સમગ્ર વિસ્તારમાં શોકનો માહોલ છવાઈ ગયો હતો. મિલકત બાબતે થતા પારિવારિક ઝઘડાથી કંટાળીને આ પગલું ભર્યું હોવાનો અનુમાન લગાવવામાં આવી રહ્યું છે.
પ્રાપ્ત વિગતો મુજબ, કૌશલ શાહ (ઉં.વ.29) અને તેમની પત્ની અંગીતા શાહ (ઉં.વ.25) છેલ્લા કેટલાક સમયથી સુરત શહેરમાં ભાડાના મકાનમાં રહી નોકરી કરતા હતા. પરિવાર સાથે મિલકત મુદ્દે અવારનવાર વિવાદ થતો હોવાને કારણે દંપતી માનસિક તાણમાં હતું. આ પરિસ્થિતિથી કંટાળીને બંને 16 જાન્યુઆરીના રોજ સુરતથી ટ્રેનમાં વડોદરા પહોંચ્યા હતા.
વિશ્વામિત્રી રેલવે સ્ટેશન નજીક ટ્રેક પરથી પસાર થતી ટ્રેન નીચે પડતું મૂકતાં બંનેને ગંભીર ઇજાઓ પહોંચી હતી અને ઘટના સ્થળે જ તેમના કરુણ મોત નિપજ્યાં હતા. ઘટનાની જાણ થતાં જ સ્ટેશન માસ્તરે રેલવે પોલીસને માહિતી આપી હતી. રેલવે પોલીસ તાત્કાલિક સ્થળ પર પહોંચીને મૃતદેહોનો કબજો લઈ સયાજી હોસ્પિટલ ખાતે પોસ્ટમોર્ટમ કરાવ્યું હતું.
પોસ્ટમોર્ટમની કાર્યવાહી પૂર્ણ થયા બાદ બંને મૃતદેહ તેમના પરિવારજનોને સોંપવામાં આવ્યા હતા. ઉલ્લેખનીય છે કે દંપતીના લગ્નને અંદાજે બે વર્ષ થયા હતા અને તેમને કોઈ સંતાન નહોતું. વિશ્વામિત્રી રેલવે લાઇન પર અવારનવાર આવી ઘટનાઓ બનતી હોવાને કારણે ફરી એકવાર રેલવે સુરક્ષા અને માનસિક આરોગ્ય અંગે પ્રશ્નો ઊભા થયા છે.
