ગાંધીનગર: સૌરાષ્ટ્ર- કચ્છમાં સમાન્ય કરતાં અત્યંત નીચું તાપમાન નોંધાવવા સાથે કચ્છમાં ઠંડીનો ધ્રુજારો વધી જવા પામ્યો છે. આજે સોમવારે દિવસ દરમિયાન કચ્છના નલિયામાં ઠંડીનો પારો અચાનક નીચે ગગડી જવા સાથે 7 ડિગ્રીએ પહોંચી ગયો હતો. આગામી પાંચ દિવસ સુધી રાજ્યમાં કાતિલ ઠંડીનો રાઉન્ડ રહેવાનો છે. જેના પગલે ગુજરાતમાં હવે ઠંડીનો ચમકારો વધવાનો છે.
હવામાન વિભાગના વૈજ્ઞાનિકોના કહેવા મુજબ, હવે પાંચ દિવસ દરમિયાન રાજ્યમાં કાતિલ ઠંડી અનુભવાશે. કચ્છ ઉપરાંત રાજ્યના વિવિધ ભાગોમાં ઠંડી વધવાની છે. ઉત્તર- પૂર્વીય- પૂર્વીય પવનના કારણે ઠંડી યથાવત રહેશે. સૌરાષ્ટ્ર અને કચ્છમાં આજે લઘુતમ તાપમાનનો પારો નીચે ઉતરી ગયો હતો.
હવામાન વિભાગના સૂત્રોએ કહ્યું હતું કે રાજ્યમાં આજે રવિવારે અન્ય શહેરો પૈકી ભૂજમાં 11 ડિ.સે., નલિયામાં 7 ડિ.સે., કંડલા પોર્ટ પર 15 ડિ.સે., કંડલા એરપોર્ટ પર 9 ડિ.સે., ભાવનગરમાં 17 ડિ.સે., રાજકોટમાં 11 ડિ.સે., સુરેન્દ્રનગરમાં 13 ડિ.સે., મહુવામાં 14 ડિ.સે., કેશોદમાં 10 ડિ.સે., અમદાવાદમાં 13 ડિ.સે., ડીસામાં 11 ડિ.સે., ગાંધીનગરમાં 11 ડિ.સે., વલ્લભ વિદ્યાનગરમાં 13 ડિ.સે., વડોદરામાં 13 ડિ.સે., સુરતમાં 17 ડિ.સે. અને દમણમાં 17 ડિ.સે. લધુત્તમ તાપમાન નોંધાવવા પામ્યું છે.
