ધાર્મિક દર્શનથી લઈને વિકાસ કાર્યક્રમોમાં રહેશે હાજરી
વડોદરા, તા. 25
ગુજરાતના મુખ્યમંત્રી ભૂપેન્દ્ર આજે શુક્રવારના રોજ વડોદરા જિલ્લાના એકદિવસીય પ્રવાસે આવી રહ્યા છે. તેમના પ્રવાસ દરમિયાન શહેરમાં ધાર્મિક, સામાજિક તેમજ વિકાસલક્ષી કાર્યક્રમોની શ્રેણી યોજાનાર છે, જેને લઈને જિલ્લા પ્રશાસન દ્વારા તમામ જરૂરી તૈયારીઓ પૂર્ણ કરવામાં આવી છે.
સર્કિટ હાઉસ ખાતે આગમન
મુખ્યમંત્રી બપોરે 13:45 કલાકે વડોદરા સર્કિટ ખાતે આગમન કરશે. અહીં તેઓ થોડો સમય આરામ કરશે તેમજ અધિકારીઓ સાથે સંક્ષિપ્ત ચર્ચા પણ કરશે તેવી શક્યતા છે.
ખાંડેરાવ માર્કેટ ગુરુદ્વારા ખાતે દર્શન
બપોરે 14:45 કલાકે મુખ્યમંત્રી શહેરના ઐતિહાસિક ખંડેરાવ માર્કેટ ગુરુદ્વારા ખાતે જઈ દર્શન કરશે. આ ધાર્મિક સ્થળે તેઓ સમાજના કલ્યાણ અને રાજ્યની સમૃદ્ધિ માટે પ્રાર્થના કરશે.
નવલખી મેદાન ખાતે જાહેર કાર્યક્રમ
ત્યારબાદ 15:20 કલાકે મુખ્યમંત્રી નવલખી મેદાન ખાતે આયોજિત કાર્યક્રમમાં ઉપસ્થિત રહેશે. અહીં મોટી સંખ્યામાં નાગરિકો, કાર્યકરો અને આગેવાનો હાજર રહેવાની શક્યતા છે.
ખાતમુહૂર્ત અને લોકાર્પણ કાર્યક્રમ
સાંજે 16:00 કલાકે મુખ્યમંત્રી સયાજીનગર ગૃહ ખાતે વિવિધ વિકાસ કાર્યોના ખાતમુહૂર્ત અને લોકાર્પણ કાર્યક્રમોમાં સહભાગી બનશે. આ કાર્યક્રમોમાં શહેરના વિકાસને વેગ આપતા અનેક પ્રોજેક્ટ્સનો આરંભ તથા લોકાર્પણ કરવામાં આવશે.
અમદાવાદ પ્રસ્થાન
કાર્યક્રમો પૂર્ણ થયા બાદ મુખ્યમંત્રી વડોદરા એરપોર્ટ પરથી અમદાવાદ માટે રવાના થશે.
મુખ્યમંત્રીના આ પ્રવાસને લઈને શહેરમાં સુરક્ષા વ્યવસ્થા મજબૂત બનાવવામાં આવી છે તેમજ ટ્રાફિક વ્યવસ્થામાં પણ જરૂરી ફેરફાર કરવામાં આવ્યા છે. વડોદરાના વિકાસ માટે મહત્વપૂર્ણ ગણાતા આ પ્રવાસ તરફ સમગ્ર શહેરની નજર મંડાઈ છે.
