કાયદો-વ્યવસ્થાની પરિસ્થિતિનું જિલ્લા પોલીસ વડા દ્વારા અવલોકન
કાલોલ:
પોલીસ અને પ્રજા વચ્ચે મૈત્રીપૂર્ણ સંબંધો મજબૂત બને તેમજ સુરક્ષાનો વિશ્વાસ ઊભો થાય તે હેતુસર પંચમહાલ જિલ્લા પોલીસ અધિક્ષક ડૉ. હરેશભાઈ દુધાત દ્વારા કાલોલ તાલુકાના મલાવ ગામે રાત્રિ રોકાણ કરવામાં આવ્યું હતું. આ દરમિયાન એસપીએ ગ્રામજનો સાથે સીધો સંવાદ સાધી તેમની સમસ્યાઓ, સૂચનો અને પ્રશ્નો ધ્યાનપૂર્વક સાંભળ્યા હતા.
રાત્રિ રોકાણ દરમિયાન એસપીએ ગામની સામાજિક તથા આર્થિક પરિસ્થિતિ અંગે માહિતી મેળવી હતી. સાથે જ કાયદો અને વ્યવસ્થાની સ્થિતિનું અવલોકન કરી ગ્રામજનોને પોલીસ તરફથી સંપૂર્ણ સહકાર આપવાનો વિશ્વાસ આપ્યો હતો. ગ્રામજનો દ્વારા રજૂ કરાયેલા પ્રશ્નો અને સમસ્યાઓના નિવારણ માટે યોગ્ય કાર્યવાહી કરવાની ખાતરી આપવામાં આવી હતી.
પ્રાથમિક શાળા અને આરોગ્ય કેન્દ્રની મુલાકાત
ડૉ. હરેશ દુધાતે મલાવ ગામની પ્રાથમિક શાળાની મુલાકાત લઈ વિદ્યાર્થીઓ સાથે શૈક્ષણિક સંવાદ કર્યો હતો અને શિક્ષણના મહત્વ પર ભાર મૂક્યો હતો. ઉપરાંત ગામના આરોગ્ય કેન્દ્રની સુવિધાઓની સમીક્ષા કરી આરોગ્ય સેવાઓ વધુ સશક્ત બને તે અંગે માર્ગદર્શન આપ્યું હતું.
સાયબર ક્રાઇમથી જાગૃતિ અને વ્યસનમુક્તિનો સંદેશ
રાત્રિ સભા દરમિયાન એસપીએ ગ્રામજનોને સાયબર ક્રાઇમ અંગે જાગૃત કર્યા હતા અને ઓનલાઇન ઠગાઈથી બચવા જરૂરી સાવચેતીઓ અંગે માહિતી આપી હતી. સાથે જ યુવાઓને વ્યસનમુક્તિનો સંદેશ આપી સ્વસ્થ અને સુરક્ષિત સમાજના નિર્માણ માટે અપીલ કરી હતી.
‘ગોકુલધામ’ જેવી આદર્શ ગામની સંકલ્પના
ડૉ. દુધાતે ગામડું ‘ગોકુલધામ’ જેવું આદર્શ બને તે માટે લોકભાગીદારી અને પોલીસ-જન સહકાર અનિવાર્ય હોવાનું જણાવ્યું હતું. જિલ્લા પોલીસ વડાના આ પ્રજાભિમુખ અભિગમથી ગ્રામજનોમાં પોલીસ પ્રત્યે વિશ્વાસ અને સહકારની ભાવના વધુ મજબૂત બની હોવાનું જોવા મળ્યું હતું.
