વડોદરાની નવી કલેકટર કચેરીને મળ્યો ધમકીભર્યો ઈ-મેલ
“1 વાગ્યા સુધી બ્લાસ્ટ થશે” લખાતા જ બોમ્બ અને ડોગ સ્ક્વોડ તૈનાત
તપાસ બાદ કોઈ વાંધાજનક વસ્તુ ન મળતા તંત્રે રાહતનો શ્વાસ લીધો
(પ્રતિનિધિ) વડોદરા
વડોદરાની દિવાળીપુરા વિસ્તારમાં આવેલી નવી જિલ્લા કલેકટર કચેરીને બોમ્બથી ઉડાવી દેવાની ધમકીભર્યો ઈ-મેલ મળતા ગુરુવાર સવારે તંત્રમાં દોડધામ મચી ગઈ હતી. કલેકટર કચેરી ખુલતા જ અધિકારીઓના ધ્યાન પર આ ઈ-મેલ આવતા તાત્કાલિક સ્થાનિક પોલીસને જાણ કરવામાં આવી હતી.
“કલેકટર ઓફિસમાં RDX મુકવામાં આવ્યા છે” લખાયું ઈ-મેલમાં
મળેલા ધમકીભર્યા ઈ-મેલમાં સ્પષ્ટ લખવામાં આવ્યું હતું કે, “કલેકટર ઓફિસમાં RDX મુકવામાં આવ્યા છે અને બપોરે 1 વાગ્યા સુધી બ્લાસ્ટ થશે, તેથી ઓફિસ ખાલી કરી દેવી.” આ ગંભીર ધમકીના પગલે તંત્રએ તરત જ સુરક્ષા પ્રોટોકોલ અમલમાં મૂક્યો હતો.
પોલીસ, બોમ્બ સ્ક્વોડ અને ડોગ સ્ક્વોડ ઘટના સ્થળે
ઈ-મેલ મળતાની સાથે જ વડોદરા શહેર પોલીસના ઉચ્ચ અધિકારીઓ, બોમ્બ સ્ક્વોડ અને ડોગ સ્ક્વોડની ટીમો કલેકટર કચેરી ખાતે દોડી આવી હતી. સમગ્ર કચેરીને ખાલી કરાવી કર્મચારીઓને સલામત સ્થળે ખસેડવામાં આવ્યા હતા અને બિલ્ડિંગની દરેક જગ્યાએ ઝીણવટભરી તપાસ હાથ ધરવામાં આવી હતી.
સુરક્ષા વ્યવસ્થા કડક, વિસ્તાર સીલ
કોઈપણ અનિચ્છનીય ઘટના ન બને તે માટે કલેકટર કચેરી આસપાસનો વિસ્તાર પોલીસ બંદોબસ્ત હેઠળ લેવામાં આવ્યો હતો. સ્ટાફને એલર્ટ પર રાખવામાં આવ્યો હતો અને સમગ્ર કાર્યવાહી દરમિયાન સુરક્ષા વ્યવસ્થા વધુ કડક કરવામાં આવી હતી.
તપાસમાં કોઈ ખતરનાક વસ્તુ મળી નહિ
બોમ્બ અને ડોગ સ્ક્વોડ દ્વારા કરાયેલી વિસ્તૃત તપાસ દરમિયાન કોઈપણ પ્રકારની વિસ્ફોટક કે શંકાસ્પદ વસ્તુ મળી આવી ન હતી. જેના પગલે તંત્ર અને અધિકારીઓએ રાહતનો શ્વાસ લીધો હતો.
અગાઉ પણ રાજ્યમાં આવી ધમકીઓ મળી ચૂકી છે
ઉલ્લેખનીય છે કે ચાલુ વર્ષમાં અગાઉ અમદાવાદ, ગાંધીનગર, કલોલ સહિતના જિલ્લાઓમાં શાળાઓ અને કચેરીઓને આ પ્રકારના ધમકીભર્યા ઈ-મેલ મળી ચૂક્યા છે. તે તમામ કેસોમાં તપાસ બાદ કોઈ ખતરનાક વસ્તુ મળી ન હતી. વડોદરામાં પણ અગાઉ કચેરીઓ, સ્કૂલો અને કંપનીઓને આવા ઈ-મેલ મળ્યા હતા.
ધમકીભર્યા ઈ-મેલ ગંભીર ગુનો: પોલીસ
સ્થાનિક પોલીસના જણાવ્યા મુજબ આ પ્રકારના ઈ-મેલથી સમાજમાં ભયનો માહોલ સર્જાય છે અને તે ગંભીર ગુનો છે. ઈ-મેલ ક્યાંથી અને કોણે મોકલ્યો તે બાબતે સાયબર સેલ દ્વારા વધુ તપાસ હાથ ધરવામાં આવી છે.
