યુનાઇટેડ વેના ખેલૈયાઓ દ્વારા સોસાયટીઓના બહાર કરવામાં આવતા આડેધડ વાહન પાર્કને લઈને સ્થાનિકો હેરાન પરેશાન*
*આયોજકો દ્વારા યોગ્ય પાર્કિંગ વ્યવસ્થા ન કરાતા ગરબા ખેલૈયાઓ અને સ્થાનિકો પરેશાન*
(પ્રતિનિધિ) વડોદરા તા 26
યુનઇટેડ વે ગરબા આયોજકો દ્વારા ગરબા ખેલૈયાઓના વાહન પાર્કિંગ ની યોગ્ય વ્યવસ્થાના અભાવે ગરબા ખેલૈયાઓ દ્વારા નવરાત્રિના ચોથા નોરતે સોસાયટીઓની બહાર પોતાના વાહનો આડેધડ રીતે પાર્ક કરતા સોસાયટીના લોકોએ એકત્રિત થઈ વિરોધ કરતા એક તબક્કે સ્થાનિકો અને ગરબા ખેલૈયાઓ વચ્ચે શાબ્દિક ઘર્ષણ થયું હતું.સમગ્ર બાબતે યુનાઈટેડ વે ગરબા આયોજકો સામે સ્થાનિક પ્રસાશન નત મસ્તક બની ગયું છે.
યુનાઇટેડ વે ગરબા આયોજકો દ્વારા ગરબા મેદાન ખાતે ગરબા રમવા માટે આવતા ગરબા ખેલૈયાઓ માટે યોગ્ય અને પૂરતી વાહન પાર્કિંગની વ્યવસ્થા ન કરાતાં અહીં સતત ચોથા નોરતે ગરબા ખેલૈયાઓએ આસપાસના રહેણાંક વિસ્તારમાં આવેલી સોસાયટીઓ બહાર આડેધડ રીતે પોતાના વાહનો પાર્ક કરતા સ્થાનિકો પરેશાન થયા છે. જેને લઇને સ્થાનિકોમાં આક્રોશ જોવા મળ્યો છે.
આયોજકોની સાથે ખેલૈયાઓની પણ દાદાગીરી જોવા મળી છે. ચોથા નોરતે સોસાયટી ની બહાર ગરબા ખેલૈયાઓ દ્વારા કરવામાં આવેલ આડેધડ વાહનો પાર્કિંગ મુદ્દે પોલીસ, ટ્રાફિક પોલીસ અને સ્થાનિક પ્રસાશન દ્વારા કોઇ પગલાં ન લેવાતાં આખરે સ્થાનિકોનો પિતો છટક્યો હતો.
સ્થાનિકોએ ગરબા ખેલૈયાઓ ને વાહનો પાર્ક કરવાની ના પાડતા ગરબા ખેલૈયાઓએ દાદાગીરી કરતાં સ્થાનિકો અને ગરબા ખેલૈયાઓ વચ્ચે શાબ્દિક ઘર્ષણ થયું હતું. સ્થાનિકોએ ગરબા ખેલૈયાઓ ને સોસાયટી બહાર વાહનો પાર્ક કરશે તો ટાયરોમાથી હવા કાઢી નાખવાની ચિમકી ઉચ્ચારી હતી.
વડોદરા શહેરના કલાલી વિસ્તારોમાં યોજાતા યુનાઇટેડ વે ગરબાના આયોજકો દ્વારા પાર્કિંગની બાબતે લઈને અનેક વખત વિવાદોમાં આવ્યા છતાં તંત્રનું પેટનું પાણી હાલતું નથી બીજી તરફ પોલીસ, ટ્રાફિક પોલીસ, પાલિકા તંત્ર સહિત પ્રશાસન મૂકપ્રેક્ષક બની ગયું છે.અહીં માત્ર ટ્રાફિક પોલીસ નામની કાર્યવાહી કરતું હોય તેવું લાગે છે.
ખેલૈયાઓના આડેધડ વાહનો પાર્કિંગના કારણે સ્થાનિક લોકોને હાલાકી પડી ગઈ છે. આ સોસાયટીઓમાં સિનિયર સિટીઝન લોકો પણ હેરાન પરેશાન થઈ ગયા છે .સ્થાનિક લોકોએ અનેક વખત તંત્રને જાણ કરી પરંતુ માલેતુજાર આયોજકોની સામે જાણે તંત્ર લાચાર બની ગયું છે.તંત્રની નીતિને લઈ લોકો હેરાન થઈ રહ્યા છે.જો કોઈ અકસ્મિક બનાવો બને તો ઇમર્જન્સી વાહન પણ અંદર આવી શકે તેવી સ્થિતિ નથી રહી . બીજી તરફ યુનાઇટેડ વે ગરબાના સુરક્ષા માટે રાખેલા બાઉન્સરોની પણ દાદાગીરી જોવા મળી રહી છે ગ્રાઉન્ડમાં પાર્કિંગના બદલે સોસાયટીઓના રોડ ઉપર વાહનો પાર્ક કરવા મજબૂર કરે છે. જેને લઈને લોકો હેરાન પરેશાન થઈ ગયા છે ત્યારે સ્થાનિક લોકોએ ચોથા નોરતે ગરબા ખેલૈયાઓ ને સોસાયટી ના નાકે વાહનો પાર્ક કરવાની ના પાડતાં એક તબક્કે સ્થાનિકો અને ગરબા ખેલૈયાઓ વચ્ચે શાબ્દિક ઘર્ષણ થયું હતું.
