બમણું બીલ આવતું હોવાના આક્ષેપ સાથે સ્માર્ટ મીટર કાઢી જુના મીટર લગાવી આપવા માંગ :
પહેલા આવતું બે મહિનાનું બીલ એક મહિને આવતું હોવાના આક્ષેપ :
( પ્રતિનિધી )વડોદરા,તા.17
સ્માર્ટ સિટી વડોદરા શહેરમાં ફરી એક વખત નવા સ્માર્ટ વીજ મીટરનું ભૂત ધુણ્યું હતું. અકોટા વિસ્તારમાં આવેલી મહાત્મા ગાંધી હાઇટ્સના રહીશોએ રેસ કોર્ષ વિદ્યુત ભુવન ખાતે પ્લે કાર્ડ લઈ બમણું બિલ આવતું હોવાના આક્ષેપ સાથે ઉગ્ર વિરોધ દર્શાવ્યો હતો અને જૂના મીટર પરત લગાવી આપવા માંગણી કરી હતી.
વડોદરા શહેરમાં નવા સ્માર્ટ વીજ મીટર લગાવવાની જ્યારથી શરૂઆત થઈ ત્યારથી વિવાદ સર્જાયો હતો. નવા સ્માર્ટ વીજ મીટરો લગાવ્યા બાદ લોકોના ઘરોમાં વીજ બીલ વધુ આવી રહ્યા હોવાના આક્ષેપ સાથે જુદા જુદા વિસ્તારોમાંથી વીજ કચેરીઓ ખાતે લોકોએ મોરચા માંડીને ઉગ્ર રજૂઆતો કરી હતી.
આજે પણ આ વિરોધનો સિલસિલો યથાવત જોવા મળી રહ્યો છે. ત્યારે, આજરોજ અકોટા વિસ્તારમાં આવેલી મહાત્મા ગાંધી હાઈટના રહીશો બમણું બિલ આવી રહ્યું હોવાના આક્ષેપ સાથે રેસકોર્સ એમજીવીસીએલની મુખ્ય કચેરી બહાર પહોંચ્યા હતા. જ્યાં મીટર સ્માર્ટ હે યા ઘોટાલાના સ્લોગન સહિતના પ્લેકાર્ડ સાથે વિરોધ દર્શાવી નવા સ્માર્ટ મીટર કાઢી જૂના મીટર લગાવી આપવા માંગણી કરી હતી. મહાત્મા ગાંધી હાઈટ્સના રહીશોએ જણાવ્યું હતું કે, અમારો વિરોધ એક જ છે કે આજે વડોદરા સ્માર્ટ સિટીની વાતો ચાલી રહી છે એને બદલે હવે સ્માર્ટ મીટર લઈને આવ્યા છે. આ સ્માર્ટ મીટર નહીં સ્માર્ટ ચીટર છે. અમારી એક જ માંગણી છે કે, અમારી ત્યાં જેટલા ના ઘરોમાં સ્માર્ટ મીટર લગાવવામાં આવ્યા છે. તેને તાત્કાલિક ધોરણે હટાવી લેવામાં આવે અને જૂના મીટર પાછા આપવામાં આવે. કારણ કે, અમારું બે મહિનાનું બિલ જે 2000 રૂપિયા આવતું હતું. એ મહિનામાં બે હજાર રૂપિયાના બીલો આવતા થઈ ગયા છે. અમારી 155 મકાનની સોસાયટી છે. એમાં 50 થી 60 મીટરો લાગેલા છે. અમને એ વખતે વાત કરી હતી કે, વડોદરા શહેરમાં બધે સ્માર્ટ મીટર લાગી જશે. એ વાતને પણ આજે એક વર્ષ થઈ ગયું. અમારી એક જ માંગ છે કે, અમારે સ્માર્ટ મીટર નથી જોઈતા. અમારા જુના મીટર પાછા જોઈએ છે. જુના મીટરમાં બે મહિનાનું જે બિલ આવતું હતું. એ મહિનામાં આવતું થઈ ગયું છે. અને ક્યારે પણ બિલ આવીને આપી જાય છે. અમે બીલો ભરેલા હોય એ પાછળ નવા બિલોમાં એડ થઈને આવી જાય છે. બિલોમાં વધારો કરીને આપે છે. વિરોધ થયા બાદ રિચાર્જ સિસ્ટમ બંધ કરી છે અને બિલ આવતા થઈ ગયા છે. 50 જેટલા મકાનોમાં સ્માર્ટ વીજ મીટર લગાવેલા છે. અમારે આ સ્માર્ટ મીટર નથી જોઈતા અમને અમારા જુના મીટર પાછા આપો.
