ઉત્તરાખંડમાં મોસમ ફરી એકવાર કહેર બની રહ્યો છે. ટિહરી જિલ્લાના ગેનવાલી ભીલંગાણામાં ગુરુવારની રાત્રે વાદળ ફાટતા ભારે તબાહી સર્જાઈ હતી. સદભાગ્યે કોઈ જાનહાનિ નોંધાઈ નથી પરંતુ ખાનગી અને જાહેર મિલકતને ભારે નુકસાન થવાની શક્યતા વ્યક્ત થઈ રહી છે. ઘટનાસ્થળે મહેસૂલ વિભાગની ટીમ પહોંચીને પરિસ્થિતિનું મૂલ્યાંકન કરી રહી છે. સાથે જ આરોગ્ય, વીજળી, પાણી, પીડબ્લ્યુડી, પશુચિકિત્સા સહિતની ટીમોને એલર્ટ પર રાખવામાં આવી છે.
તે જ સમયે દેવલ તહસીલના મોપાટામાં વાદળ ફાટવાની બીજી ઘટના સામે આવી. અહીં સ્થાનિક રહેવાસીમાં તારાસિંહ અને તેમની પત્ની ગુમ થયા છે. જ્યારે વિક્રમસિંહ અને તેમની પત્ની ઘાયલ થયા છે. તેમનું રહેઠાણ અને ગૌશાળા કાટમાળમાં દટાઈ ગઈ હોવાની માહિતી છે. જેમાં 15 થી 20 પશુઓ પણ જીવ ગુમાવ્યા હોવાના અહેવાલ છે.
કાલેશ્વર વિસ્તારમાં પણ ભારે વરસાદને કારણે પહાડ પરથી કાટમાળ સરકીને સીધા જ લોકોના ઘરોમાં ઘૂસી ગયો છે. પરિસ્થિતિ ગંભીર બનતા JCB મશીનોની મદદથી કાટમાળ દૂર કરવાનો પ્રયાસ ચાલી રહ્યો છે. પોલીસ અને સ્થાનિક તંત્ર તાત્કાલિક રાહત કાર્યમાં લાગ્યા છે.
ચમોલી જિલ્લામાં સતત વરસતા વરસાદે પરિસ્થિતિ વધુ ગંભીર કરી છે. ભારે વરસાદથી રાષ્ટ્રીય ધોરીમાર્ગ ઘણી જગ્યાએ બંધ થઈ ગયો છે. ખાસ કરીને નંદપ્રયાગ, કેમેરા, ભાનેરપાણી, મેડેનાલા, જીલાસુ નજીક, ગુલાબકોટી અને ચટવાપીપાલ જેવા વિસ્તારોમાં રસ્તો અવરોધિત છે. હાલ સંબંધિત વિભાગોની ટીમો સ્થળ પર પહોંચી માર્ગ ખોલવાના પ્રયાસ કરી રહી છે.
વરસાદી તબાહીને પગલે પોલીસ અને વહીવટીતંત્રે મુસાફરોને અપીલ કરી છે કે તેઓ પુષ્ટિ વિના મુસાફરી ન કરે અને સત્તાવાર સૂચનાઓનું પાલન કરે. અધિકારીઓ અનુસાર હજી પણ વરસાદ ચાલુ રહેવાની સંભાવના હોવાથી સતર્કતા અપનાવવી અનિવાર્ય છે.
ઉત્તરાખંડમાં વારંવાર થતી વાદળ ફાટવાની ઘટનાઓએ એકવાર ફરીથી સ્થાનિક લોકોની મુશ્કેલીઓમાં વધારો કર્યો છે અને બચાવ કામગીરી માટે તંત્રને કઠિન પડકારો ઉભા કર્યા છે.
