વાઇલ્ડ લાઇફ રેસ્ક્યુ ટ્રસ્ટની ઝટપટ કામગીરીથી ‘આંધણી ચાકણ’ સાપ સહી સલામત ઉગાર્યો, વન વિભાગના હવાલે
તાંત્રિક વિધિનો ભોગ બનતા બચ્યો કિંમતી આંધણી ચાકણ
વડોદરા: વડોદરા શહેરમાં વન્યજીવન અને નગરજનોની સલામતી વચ્ચે સંકળાયેલી મહત્વની ઘટના દરમ્યાન મધુનગર નજીકના ખુલ્લા મેદાનમાં એક દુર્લભ પ્રજાતિનો ‘આંધણી ચાકણ’ સાપ જોવા મળતા સ્થાનિકો ચોંકી ઉઠ્યા હતા. ઘટના અંગે તુરંત જ નાગરિકોએ વાઇલ્ડ લાઇફ રેસ્ક્યુ ટ્રસ્ટને અપીલ કરતા વિશ્વસનીય ટીમ સ્થળ પર દોડી આવી હતી.
મળતી માહિતી મુજબ વાઇલ્ડ લાઇફ રેસ્ક્યુ ટ્રસ્ટના અભિ તથા તેમની ટીમના સભ્યો અંજની અને કાર્તિક ઝડપથી મેદાન ખાતે પહોંચી ગયા હતા. પરિસ્થિતિનું મૂલ્યાંકન કર્યા બાદ કાળજીપૂર્વક કામગીરી હાથ ધરીને સાપને સહી-સલામત રીતે કાબૂમાં લેવામાં આવ્યો હતો.
રેસ્ક્યુ બાદ સાપને યોગ્ય સંભાળ પૂર્વક વન વિભાગના અધિકારીઓને સુપ્રત કરવામાં આવ્યો હતો, જેથી તેની સુરક્ષિત હિફાજત કરી શકાય. આ ઘટનાથી આસપાસના વિસ્તારમાં ફેલાયેલા ભયનું નિવારણ થયું અને નાગરિકોએ ટીમની તાત્કાલિક કાર્યક્ષમતાને બિરદાવી હતી
અત્રે ઉલ્લેખનીય છે કે આ આંધણી ચાકણ સાપનો કાળા બજારમાં ભાવ રૂ. 2 કરોડ સુધી પહોંચી શકે છે. દુર્ભાગ્યે, અનેક સ્થળોએ તંત્રવિદ્યા અથવા તાંત્રિક વિધિના નામે આ સાપનો ઉપયોગ કરવામાં આવે છે અને તેની બલી આપવામાં આવે છે. પરંતુ જીવ વૈવિધ્યનું મહત્વ સમજાવતાં નિષ્ણાતોએ સ્પષ્ટ કર્યું છે કે આવા પ્રાણીઓનો ખોટા રસ્તે ઉપયોગ કરવો કાયદેસર ગુનો છે અને આવા પ્રયાસોને રોકવા જનજાગૃતિ જરૂરી છે.
સાપો પર્યાવરણમાં મહત્વપૂર્ણ ભૂમિકા ભજવે છે. કૃષિ અને પ્રકૃતિના સંતુલન માટે તેમનું અસ્તિત્વ જરૂરી છે. આવા દુર્લભ પ્રાણીઓને સુરક્ષિત રાખવા માટે નાગરિકોએ દર વખતે તરત જ વાઇલ્ડ લાઇફ રેસ્ક્યુ ટીમ કે વન વિભાગને જાણ કરવાની સલાહ અપાઈ છે.
