વાહનચાલકો, રાહદારીઓ તથા સ્થાનિકોને હાલાકી વેઠવી પડી*
*છેલ્લા કેટલાક દિવસોથી અહીં સવાર સાંજ ટ્રાફિકની સમસ્યા છતાં તંત્ર દ્વારા કોઇ પગલાં ન લેવાતાં લોકોમાં આક્રોશ*
(પ્રતિનિધિ) વડોદરા તા. 27
શહેરના કલાલી બ્રિજથી ખિસકોલી સર્કલ નજીક છેલ્લા કેટલાક દિવસોથી ટ્રાફિક ની સમસ્યા વિકટ બની છે. સવાર અને સાંજે અહીં ટ્રાફિકની સમસ્યા વધુ વિકટ બની ગઇ છે. જેના કારણે વાહનચાલકો, રાહદારીઓ તથા સ્થાનિકોને ભારે હાલાકી વેઠવાનો વારો આવ્યો છે.
શહેરના કલાલી થી વડસર બ્રિજ તરફના માર્ગે એટલે ખિસકોલી સર્કલથી અટલાદરા અને મકરપુરા તથા અક્ષરચોક તરફ જવાના માર્ગે છેલ્લા કેટલાક દિવસોથી ટ્રાફિકની સમ્યા વિકટ બની છે શુક્રવારે સાંજે અહીં ખિસકોલી સર્કલ નજીક ટ્રાફિક જામ સર્જાયો હતો જેના કારણે નોકરિયાત વર્ગ અને અન્ય રાહદારીઓ,વાહનદારીઓ ટ્રાફિક જામમાં અટવાયા હતા. સાથે જ સ્થાનિક રહીશોને પણ હાલાકી ભોગવવાનો વારો આવ્યો હતો. અહીં ટ્રાફિક પોલીસ કે ટીઆરબી જવાનો ન હોય અવારનવાર ટ્રાફિક જામની સમસ્યા સર્જાતી હોય છે. મકરપુરા ઔધોગિક એકમ આવેલું હોવાથી તેમજ અહીં અટલાદરા, અક્ષરચોક થી જૂના પાદરા રોડ, વડસર, મકરપુરા જવાનો માર્ગ હોય ખિસકોલી સર્કલ પાસે સવાર સાંજ ટ્રાફિકની સમસ્યા સર્જાતી હોય છે. સાથે જ આ ટ્રાફિકને કારણે અવારનવાર અકસ્માત પણ થતાં હોય છે. અહીંથી ભારદારી ડમ્પરોની પણ અવરજવર રહે છે. થોડા સમય પહેલા ડમ્પરથી એક આધેડનું મૃત્યુ નિપજ્યું હતું. તદ્પરાંત નાના મોટા અકસ્માત સર્જાતા હોય છે. જ્યારે કોઇ અકસ્માતની ઘટના બને તેના બે ચાર દિવસ અહીં ટ્રાફિક પોલીસ દ્વારા ટ્રાફિક નિયમન વ્યવસ્થા કરવામાં આવે છે. પરંતુ ફરીથી પરિસ્થિતિ જૈસે થે ની થાય છે જેના કારણે ખિસકોલી સર્કલ નજીક અવારનવાર સવાર સાંજ ટ્રાફિકની સમસ્યા વિકટ બની રહી છે.bઅહી નજીકમાં જ સાંઇબાબા વિધ્યાલય, કેમિકલ કંપની આવેલી છે નજીકમાં બાપ્સની મોટી હોસ્પિટલ ઉપરાંત કેટલીક ઓફિસો હોય દરરોજના લોકોની અવરજવર વધુ રહેતી હોય છે. અહી સ્થાનિકો માટે ટ્રાફિકની સમસ્યા માથાના દૂખાવો સમાન બની છે. સાથે જ અકસ્માતની ભીતિ પણ સેવાઇ રહી છે ત્યારે શુક્રવારે સાંજે અહીં ટ્રાફિક જામ સર્જાયો હતો. છેલ્લા ઘણા સમયથી અહીં ટ્રાફિકની સમસ્યા વિકટ બની હોવા છતાં ટ્રાફિક વિભાગ કે સ્થાનિક પોલીસ દ્વારા કોઇ પગલાં લેવામાં આવ્યાં નથી. શું તંત્ર કોઇ મોટા અકસ્માત કે પછી દુર્ઘટનાની રાહ જોઇ રહ્યું છે?
