ઘરમાંથી રૂ.6.62 લાખનો જથ્થો કબજે
એસઓજીની ડભોઇ રોડ પર વુડાના મકાનમાં રેડ, સપ્લાયર સહિત બે વોન્ટેડ
વડોદરા શહેરના ડભોઇ રોડ પર વુડાના મકાનમાં રહેતા શખ્સે રાજસ્થાનથી ડ્રગ્સ લાવી તેના ભાડાના ઘરમાં સંતાડી રાખ્યો હતો. જેથી એસઓજીએ રહેણાંક મકાનમાં રેડ કરીને પેડલરને રૂા.6.62 લાખના મેફેડોન ડ્રગ્સ સાથે ઝડપી પાડયો હતો. સપ્લાયર સહિત બે જણાને વોન્ટેડ જાહેર કર્યા હતા. કપુરાઈ જુના જકાતનાકા પાસે ડિલિવરી આપવા જતા પહેલા જ તેને દબોચી લીધો હતો. તેના ઘરમાંથી ડ્રગનો જથ્થો, મોબાઈલ અને રોકડ રકમ મળી રૂ.6.73 લાખનો મુદ્દામાલ કબજે કર્યો છે.
વડોદરા શહેરના જુદા જુદા વિસ્તારોમાં છુપી રીતે એમડી ડ્રગ્સ, ગાંજો, અફીણ થતા હેરોઇન સહિતના નશાયુક્ત પદાર્થોની હેરાફેરી કરવા સાથે વેચાણ પણ કરવામાં આવતું હોય છે. ત્યારે આવા નશીલા પદાર્થોનો વેપલો કરનારને ઝડપી પાડવા માટે એસઓજી પીઆઈ એસ.ડી.રાતડાએ અલગ-અલગ ટીમો બનાવી કવાયત શરૂ કરી છે. જેને લઇ એસઓજી ટીમ શહેર વિસ્તારમાં પેટ્રોલીંગમા ફરી રહી હતી. તે દરમ્યાન બાતમી મળી હતી કે ડભોઇ રોડ વુડાના મકાનમાં રહેતો અશોક મહીપાલ આજે વહેલી સવારે રાજસ્થાનથી એમડી ડ્રગ્સનો જથ્થો લઇને આવ્યો છે હાલમાં તેનો જથ્થો ઘરમાં સંતાડી રાખ્યો છે અને બપોરના સમયે કપુરાઇ જુના જકાતનાકાની આજુબાજુમાં કોઇને ડીલીવરી આપવા જવાનો છે. જેના આધારે પીઆઈ સહિતની ટીમે બાતમીવાળી જગ્યાએ તેના ઘરે રેઇડ કરતાં અશોકકુમાર મહીપાલ મેઘવાલ સ્થળ પરથી ઝડપાઈ ગયો હતો. જ્યારે નિલોફર મુન્નાભાઇ સલમાની (રહે. તાંદલજા વડોદરા શહેર) અને કાલુ (રહે.પ્રતાપગઢ રાજસ્થાન) વોન્ટેડ જાહેર કરવામાં આવ્યો હતો. એસઓજી પોલીસે સ્થળ પરથી મેફેડ્રોન ડ્રગ્સ 66 ગ્રામ 280 મિલિગ્રામ રૂ.6.62 લાખ, મોબાઇલ ફોન નંગ-1 રૂ.10 હજાર અને રોકડા રૂ. 6.73 લાખનો મુદ્દામાલ કબ્જે કર્યો છે.
