નવા યાર્ડ રોડ સેન્ટ જોસેફ સ્કૂલની બાજુમાં આવેલા સંતોક ચેમ્બર બહાર ભ્રષ્ટાચારનો ભુવો નિર્માણ પામ્યો :
( પ્રતિનિધિ )વડોદરા,તા.20
વડોદરા શહેરમાં ફરી એક વખત ભુવા આકાર પામવાનો સિલસિલો શરૂ થયો છે. નવાયાર્ડ રોડ ઉપર આવેલ સેન્ટ જોસેફ સ્કૂલ પાસેના સંતોક ચેમ્બર બહાર ભુવામાં સિમેન્ટ ભરેલી ટ્રકના પાછળના ટાયર ખૂંપી ગયા હતા.
ભુવા નગરી તરીકે ઓળખાતી વડોદરા નગરીમાં વધુ એક ભુવાએ આકાર લીધો છે. છાણી સ્થિત સેન્ટ જોસેફ સ્કૂલ પાસે સરદાર નગર સંતોક ચેમ્બર સામે ભુવો પડ્યો છે. આજે ત્યાંથી પસાર રહેલી એક ટ્રકનો પાછળનો ભાગ ભુવામાં ખાબક્યો હતો. ટ્રક આખી નમી પડી હતી. ટ્રકમાં સિમેન્ટની ગુણો નાખવામાં આવી હતી. જોકે સદનસીબે બનાવને પગલે કોઈ જાનહાની થવા પામી ન હતી. મહત્વની બાબત છે કે, આ રોડ પર પહેલા કોઈ ખાડો પડ્યો ન હતો. પરંતુ આજે અચાનક જ આ ભુવો નિર્માણ પામ્યો અને તેમાં ટ્રકના ટાયર ફસાઈ ગયા, હાલ ક્રેનની મદદ વિના આ ટ્રકને બહાર કઢાઈ નહીં તેવી પરિસ્થિતિ ઉભી થઇ છે. તો બીજી તરફ પાસે જ સ્કૂલ આવેલી છે. ક્યારેક બાળકોના માથે અકસ્માતનું જોખમ ઊભું થયું છે. અગાઉ પણ ઘણી વખત કોન્ટ્રાક્ટર અને અધિકારીઓ વચ્ચેની મીલીભગતની પોલ ઉઘાડી પડી છે, છતાં પણ આ અંગે કડક કાર્યવાહી નહીં થતા ભુવા પડવાનો સિલસિલો આજે પણ યથાવત જોવા મળી રહ્યો છે.
