ફટાકડાનું તણખલું ઉડીને પડ્યું હોવાથી આગ લાગી હોવાનું પ્રાથમિક અનુમાન :
( પ્રતિનિધિ )વડોદરા,તા.31
વડોદરા શહેરના કારેલીબાગ પાણીની ટાંકી પાસે દીપિકા સોસાયટી – પાર્શ્વ પ્રાર્થના ફ્લેટ નજીકના વીજ ટ્રાન્સફોર્મરમાં મોડી રાત્રે આગ લાગતા તંત્ર દોડતું થયું હતું. જ્યારે સ્થાનિક લોકોમાં પણ ભયનો માહોલ ફેલાયો હતો.
વડોદરા શહેરમાં હાલ દિવાળીના તહેવારો ચાલી રહ્યા છે. તેવામાં શહેરમાં કેટલાક વિસ્તારોમાં આગ જનીના પણ બનાવો ન થઈ રહ્યા છે તેવી જ રીતે બુધવારે મોડી રાત્રે શહેરના કારેલીબાગ વિસ્તારમાં આગ લાગવાની ઘટના બની હતી. કારેલીબાગ વિસ્તારમાં દીપિકા સોસાયટી પાસે પાર્શ્વ પ્રાર્થના ફ્લેટ નજીક મધ્ય ગુજરાત વીજ કંપનીના લાગેલા વીજ ટ્રાન્સફોર્મરમાં એકાએક આગ લાગતા આ આગ પ્રસરતા ઝાડમાં લાગી હતી.
આગે વિકરાળ સ્વરૂપ ધારણ કરતા આસપાસના લોકો પણ ઘટના સ્થળે દોડી આવ્યા હતા અને બનાવની જાણ ફાયબ્રિગેડને કરવામાં આવી હતી. જેથી ફાયર બ્રિગેડ અને જીઈબીના કર્મચારીઓ સ્થળ પર દોડી આવ્યા હતા. સદ નસીબે આગના આ બનાવવામાં કોઈ જાનહાનિ થઈ ન હતી. પ્રાથમિક તબક્કે ફટાકડાનું તણખલું ઉડીને આવીને પડ્યું હોય જેના કારણે આ આગ લાગી હોવાનું પ્રાથમિક અનુમાન લગાવાયું હતું.
