( પ્રતિનિધિ ) વડોદરા તા.12
મકરપુરા એસ ટી બસ ડેપો ની સામે વર્ષો જૂનું વિશાળ વૃક્ષ એકાએક ધરાશાયી થયું હતું. જ્યાં ઝાડ નીચે ગલ્લો ચલાવી પેટિયું રડતા વૃદ્ધનો આબાદ બચાવ થયો હતો. જ્યારે ગલ્લાંને ભારે માત્રામાં નુકશાન પહોંચ્યું હતું. બનાવને પગલે ફાયરબ્રિગેડના જવાનોએ સ્થળ પર પહોંચી કામગીરી હાથધરી હતી.
મકરપુરા રોડ બસ ડેપોની સામે વર્ષો જૂનું વિશાળ વૃક્ષ બપોરના સુમારે એકાએક તે કડડભૂસ થયું હતું. પ્રાપ્ત માહિતી અનુસાર મકરપુરા એસટી ડેપો સામે વિશાળ વડનું વૃક્ષ આજે અચાનક ધરાશાયી થયું હતું. જ્યાં ફૂટપાટ પર વર્ષોથી પાન પડીકીનો ગલ્લો ચલાવતા એક વૃદ્ધ ગલ્લામાં બેઠા હતા. જોકે મોટો અવાજ થતા તુરંત તેઓ બહાર નીકળી ગયા હતા. જેથી તેમનો આબાદ બચાવ થયો હતો. જ્યારે વિશાળ વૃક્ષ નીચે તેમનો ગલ્લો દબાઈ ગયો હતો. જેથી તેમને ભારે નુકસાન થયું હતું. ગલ્લો ચલાવતા જેઠાભાઈ પરમારે જણાવ્યું હતું કે હું ગલ્લામાં જ બેઠો હતો. અચાનક પાછળથી મોટો અવાજ થયો એટલે હું તરત ગલ્લામાંથી બહાર આવી ગયો એટલામાં વડનું વૃક્ષ ગલ્લા પર પડતા ગલ્લો દબાઈ ગયો અને હું બચી ગયો હતો. વૃક્ષ ગલ્લા પર પડતા મારે 70 થી 80 હજાર જેટલું નુકસાન થયું છે તેમ જણાવ્યું હતું. જ્યારે ફાયરબ્રિગેડના જવાનોએ સ્થળ પર પહોંચી વૃક્ષ હટાવવાની કામગીરી હાથધરી હતી.
