સિક્યુરિટી પેટે આપેલા ચેકનો દુરુપયોગ કરી ફરિયાદ કરાઈ હોવાનું સાબિત
કાલોલ |
સિક્યુરિટી પેટે આપેલ ચેકનો ઉપયોગ કરી ચેક રિટર્નની ફરિયાદ કરાઈ હોવાના મામલે હાલોલ એડી ચીફ જુડિશિયલ મેજિસ્ટ્રેટ કોર્ટ દ્વારા મહત્વપૂર્ણ ચુકાદો આપવામાં આવ્યો છે. કોર્ટે આરોપી મનોજકુમાર રમણલાલ પારેખને નિર્દોષ જાહેર કરી છોડી મૂકવાનો હુકમ કર્યો છે.
હાલોલના દુનિયા વિસ્તારમાં આવેલી પાઠક સ્ટીલ ટ્રેડર્સના ભાગીદાર બ્રીજમોહન રામપ્રસાદ કેડિયા દ્વારા હાલોલના માજા એન્ટરપ્રાઇઝના પ્રોપરાઇટર મનોજકુમાર પારેખ સામે ચેક રિટર્ન અંગે ફરિયાદ કરવામાં આવી હતી. ફરિયાદ મુજબ આરોપીએ રૂ. 2,03,385/- બાકી રકમ પેટે તા. 16/08/2018નો IDFC First Bank હાલોલ શાખાનો ચેક આપ્યો હતો, જે “Payment Stopped by Drawer” ના શેરા સાથે રિટર્ન થયો હતો.
આરોપીની મજબૂત બચાવ દલીલો
આરોપી તરફેથી એડવોકેટ જે. બી. જોશીએ દલીલ કરી હતી કે આ ચેક સિક્યુરિટી પેટે અપાયેલો હતો અને તેની તારીખમાં હેરફેર કરવામાં આવી હતી. મૂળ તા. 16/03/2018ને બદલે તા. 16/08/2018 લખવામાં આવી હતી. ઉપરાંત આરોપીએ આરટિજીએસ તથા રોકડ દ્વારા સમગ્ર ચુકવણી કરી હોવાનું કોર્ટ સમક્ષ રજૂ કરાયું હતું.
ફરિયાદી દ્વારા કઈ તારીખે, કેટલી રકમનો અને કેટલા વજનનો માલ આપ્યો તેની કોઈ સ્પષ્ટ વિગતો, ઇન્વોઇસ, ડિલિવરી ચલણ કે સ્ટેટમેન્ટ રજૂ કરી શકાઈ નહોતી. ઉલટ તપાસ દરમિયાન ફરિયાદીએ સિક્યુરિટી પેટે ચેક લેતા હોવાની કબૂલાત પણ કરી હતી.
FSL રિપોર્ટ નિર્ણાયક બન્યો
આરોપીની અરજીથી ચેકને **ફોરેન્સિક સાયન્સ લેબોરેટરી (FSL)**માં તપાસ માટે મોકલવામાં આવ્યો હતો. FSL રિપોર્ટમાં ચેકમાં material alteration એટલે કે તારીખમાં સુધારો થયો હોવાનું સ્પષ્ટ થયું, જેના આધારે કોર્ટએ આ ચેકને માન્ય દસ્તાવેજ ગણાવી શકાય નહીં તેમ ઠરાવ્યું.
કોર્ટનો ચુકાદો
આ તમામ પુરાવા અને દલીલોને આધારે હાલોલના એડી ચીફ જુડિશિયલ મેજિસ્ટ્રેટ જે. કે. ક્રિશ્ચિયને આરોપીને ચેક રિટર્નના ગુનામાં નિર્દોષ જાહેર કરી છોડી મૂકવાનો હુકમ કર્યો છે.
આ ચુકાદો સિક્યુરિટી ચેકના દુરુપયોગ અંગે મહત્વપૂર્ણ ગણાઈ રહ્યો છે.
