હાલોલ:
હાલોલ ઔધોગિક વિસ્તારમાં સાથરોટા રોડ પર પ્રતિબંધિત પ્લાસ્ટિક કેરી બેગ ઉત્પાદન કરતા ત્રણ યુનિટોમાં ટાસ્ક ફોર્સ દ્વારા છાપો મારતા પ્રતિબંધિત પ્લાસ્ટિક કેરી બેગનો જથ્થો તેમજ પ્લાસ્ટિક દાણા એમ કુલ મળી 65 લાખ રૂપિયા ના મુદ્દા માલ ઝડપી પાડી મુદ્દા માલને કંપનીમાં સીઝ કરી ત્રણે યુનિટોને તાત્કાલિક અસરથી સીલ મારી દેવામાં આવ્યા છે.
ગુરૂવારના રોજ રાત્રે 9:00 કલાકે ના અરસામાં હાલોલ પોલ્યુશન વિભાગ, પોલીસ , વહીવટી તંત્ર, હાલોલ નગરપાલિકાના મુખ્ય અધિકારી તેમજ તેમની ટીમ એટલે કે ટાસ્ક ફોર્સ દ્વારા જીઆઇડીસીના સાથરોટા રોડ પર ત્રણ ફેક્ટરીઓમાં છાપો મારતા આ યુનિટોમાંથી પ્રતિબંધિત પ્લાસ્ટિક કેરી બેગનો જથ્થો 15 ટન જેટલો ઝડપી પાડવામાં આવ્યો છે. જ્યારે પ્રતિબંધિત પ્લાસ્ટિકનું ઉત્પાદન કરતા એક યુનિટ ના કાર્ય ક્ષેત્રની અંદરથી જ 50 ટન જેટલો પ્લાસ્ટિક દાણાનો જથ્થો પણ મળી આવતા ટાસ્ક ફોર્સ દ્વારા પ્રતિબંધિત પ્લાસ્ટિકનો જથ્થો તેમજ દાણા એમ કુલ 65 લાખ રૂપિયાનો મુદ્દા માલ જપ્ત કરી ત્રણેય કંપનીઓમાં આ મુદ્દા માલ સીઝ કરીને ત્રણેવ કંપનીઓ ને સીલ મારી કાયદેસરની કાર્યવાહી હાથ ધરી હોવાનું જાણવા મળે છે.
જોકે મળતી માહિતી મુજબ ટાસ્ક ફોર્સ ની કામગીરીની જાણ અન્ય યુનિટો ના માલિકોને થતાં તેઓ પોતાના યુનિટોની લાઈટો બંધ કરી સલામત રીતે પોતાના ઘર તરફ રવાના થઈ ગયા હોવાની ચર્ચાઓ સાંભળવા મળતી હતી. આમ પ્રતિબંધિત પ્લાસ્ટિક ઝભલા બનાવતી કંપનીઓમાં ફફડાટ વાપી જવા પામ્યો હતો.
