( પ્રતિનિધી )વડોદરા,તા.1
વડોદરા શહેરમાં વરસાદી માહોલ વચ્ચે સરીસૃપ અને મગર રહેણાંક વિસ્તારોમાં આવી જતા હોવાના બનાવો યથાવત જોવા મળી રહ્યા છે તેવામાં હરણી સમા લિંક રોડ ઉપર આવેલ પંચામૃત રેસીડેન્સી ખાતેના પાર્કિંગમાં આવી ચડેલા મહાકાય મગરનું સહી સલામત રીતે રેસ્ક્યુ કરવામાં આવ્યું હતું.
વડોદરા શહેરમાં કમોસમી વરસાદ વરસી રહ્યો છે. ત્યારે શહેરના જુદા જુદા વિસ્તારોમાં રેસીડેન્સીયલ એરિયામાં મગર આવી જતા હોવાના કિસ્સા સામે આવી રહ્યા છે. તેવામાં વધુ એક મગરનું રેસ્ક્યુ કરવામાં આવ્યું હતું. હરણી સમા લિંક રોડ ઉપર આવેલ પંચામૃત રેસીડેન્સી ખાતે ફ્લેટના પાર્કિંગમાં મગર આવી જતા ફ્લેટના રહીશોમાં ફફડાટ ફેલાયો હતો. મગર અંગેની જાણ સ્થાનિક લોકોને થતા તાત્કાલિક પ્રાણીપ્રેમી સંસ્થાનો સંપર્ક કરવામાં આવ્યો હતો. જેથી સંસ્થાના કાર્યકરોએ વન વિભાગના રેસ્ક્યુઅરને સાથે રાખી સ્થળ પર પહોંચતા આશરે સાડા પાંચથી છ ફૂટ જેટલો મહાકાય મગર નજરે પડ્યો હતો. જેને સહી સલામત રીતે રેસ્ક્યુ કરીને વન વિભાગ ખાતે લઈ જવામાં આવ્યો હતો.
