રાત્રિના અંધારામાં જીવલેણ બની રહેલી ચેમ્બર: સ્કૂલ-કોલેજના વિદ્યાર્થીઓ અને પદયાત્રીઓ પર અકસ્માતનું તોળાતું જોખમ
વડોદરા શહેરના દક્ષિણ વિસ્તારમાં આવેલા અત્યંત વ્યસ્ત એવા સુસેન ચાર રસ્તા પાસે રોડની સાઈડમાં આવેલી ગટરની ચેમ્બર છેલ્લા ઘણા સમયથી ખુલ્લી હાલતમાં હોવાને કારણે સ્થાનિક રહીશો અને વાહનચાલકોમાં ફફડાટ વ્યાપી ગયો છે. સ્માર્ટ સિટીના દાવાઓ વચ્ચે રસ્તાની મધ્યમાં કે સાઈડમાં આ પ્રકારે ખુલ્લી ગટર તંત્રની ગંભીર બેદરકારીની ચાડી ખાઈ રહી છે. આ ખુલ્લી ચેમ્બર હવે રાહદારીઓ અને વાહનચાલકો માટે ‘મોતનું છટકું’ સાબિત થઈ રહી છે.
સ્થાનિક રહીશોના જણાવ્યા અનુસાર, સુસેન ચાર રસ્તા એવો વિસ્તાર છે જ્યાંથી દિવસ-રાત હજારોની સંખ્યામાં નાના-મોટા વાહનોની અવરજવર રહે છે. આ માર્ગ પર આવેલી ગટરની ચેમ્બરનું ઢાંકણું તૂટી ગયું છે અથવા ગુમ છે, જેના કારણે ઊંડી ગટર સીધી દેખાય છે. ખાસ કરીને રાત્રિના સમયે આ વિસ્તારમાં પૂરતો પ્રકાશ ન હોવાને કારણે વાહનચાલકોને આ ખુલ્લી ચેમ્બર દેખાતી નથી, જેને પગલે અકસ્માત થવાની પૂરેપૂરી શક્યતાઓ રહેલી છે. ભૂતકાળમાં પણ અનેક ટુ-વ્હીલર ચાલકો આ ચેમ્બરના કારણે સ્લિપ ખાઈ ગયા હોવાની વિગતો પ્રકાશમાં આવી છે.
સૌથી વધુ ચિંતાની બાબત એ છે કે આ વિસ્તારમાં શાળાઓ અને કોલેજો આવેલી હોવાથી મોટી સંખ્યામાં વિદ્યાર્થીઓ અહીંથી પસાર થાય છે. નાનાં બાળકો રમતા-રમતા કે ચાલતા આ ગટરમાં ખાબકે તેવી દહેશત વાલીઓમાં જોવા મળી રહી છે. આ ગંભીર સમસ્યા અંગે સ્થાનિકો દ્વારા વડોદરા મહાનગર પાલિકાના સંબંધિત વિભાગ અને વોર્ડ કચેરીમાં અનેકવાર મૌખિક તેમજ લેખિત રજૂઆતો કરવામાં આવી છે. તેમ છતાં, તંત્ર દ્વારા હજુ સુધી કોઈ પણ પ્રકારની નક્કર કામગીરી કરવામાં આવી નથી.
લોકોમાં તંત્રની આ ઉદાસીનતા સામે ભારે રોષ જોવા મળી રહ્યો છે. રહીશો પ્રશ્ન કરી રહ્યા છે કે શું તંત્ર કોઈ મોટી જાનહાનિ કે ગંભીર અકસ્માત સર્જાય તેની રાહ જોઈ રહ્યું છે? શું કોઈનો જીવ ગયા પછી જ આ ગટર પર ઢાંકણું બેસાડવામાં આવશે? હાલમાં તો આ ખુલ્લી ગટર પસાર થતા દરેક વ્યક્તિ માટે ભયનો વિષય બની ગઈ છે. સ્થાનિકોએ વહીવટી તંત્રને ચીમકી આપી છે કે જો આગામી ટૂંક સમયમાં આ ચેમ્બર પર મજબૂત કવર મૂકીને તેને સુરક્ષિત કરવામાં નહીં આવે, તો જનતા દ્વારા ઉગ્ર આંદોલન કરવામાં આવશે.
હાલમાં તો સુસેન ચાર રસ્તા પાસેથી પસાર થતા લોકો જીવ હથેળીમાં રાખીને મુસાફરી કરવા મજબૂર બન્યા છે અને તંત્ર વહેલી તકે સફાળું જાગે તેવી આશા સેવી રહ્યા છે.
