( પ્રતિનિધિ )વડોદરા,તા.11
વીજ કંપનીના સ્માર્ટ વીજ મીટર અંગે ગ્રાહકોમાં ફેલાયેલી ગેરસમજો દૂર કરવા માટે મધ્ય ગુજરાત વીજ કંપની દ્વારા સ્માર્ટ મીટર પખવાડિયાની ઉજવણી કરવામાં આવી હતી. આ દરમિયાન ગ્રાહકોને સ્માર્ટ મીટરના ફાયદા અને સ્માર્ટ મીટર કેવી રીતે કાર્ય કરે છે, તેના લાઈવ ડેમો સાથે માર્ગદર્શન આપવામાં આવ્યું હતું.
સ્માર્ટ મીટર પખવાડિયા દરમ્યાન એમજીવીસીએલ દ્વારા વિવિધ પ્રવૃત્તિઓ હાથ ધરવામાં આવી હતી. સ્માર્ટ મીટર અંગે વીજગ્રાહકોને થતાં પ્રશ્નો શંકાના નિવારણ તેમજ પૂરતી સમજણ આપવા હેતુસર સ્માર્ટ મીટર પખવાડિયા અંતર્ગત એમજીવીસીએલના કાર્યક્ષેત્ર હેઠળ આવતા તમામ 7 જિલ્લાઓમાં નગરપાલિકા, શહેરી તથા ગ્રામ્ય વિસ્તારોમાં વર્કશોપ તેમજ ડોર ટુ ડોર મુલાકાતનું આયોજન કરી ગ્રાહકોને સ્માર્ટ મીટરના ફાયદાઓ અંગે માહિતી આપવામાં આવી હતી. જેમાં સ્માર્ટ મીટર કેવી રીતે કાર્ય કરે છે, તેની લાઈવ ડેમો, સ્માર્ટ મીટર મોબાઇલ એપ અને ઓનલાઈન પોર્ટલ ઉપયોગ અંગે માર્ગદર્શન તેમજ ગ્રાહકોને સ્માર્ટ મીટર અંગેની માહિતી માટેના પેમ્ફલેટ આપી ઓનલાઈન પેમેન્ટ કરવા માટેના વિવિધ વિકલ્પોની ગ્રાહકોને સમજ આપવામાં આવી રહી છે. જેનો ગ્રાહકો તરફથી સકારાત્મક પ્રતિસાદ મળી રહ્યો છે.
