વડોદરા મહાનગર પાલિકાની સ્થાયી સમિતિ સમક્ષ વિવિધ વિભાગોની કુલ 8 કામોની દરખાસ્ત રજૂ કરવામાં આવી છે. શુક્રવાર, તા. 13 જૂને યોજાનારી બેઠકમાં આ દરખાસ્તો પર ચર્ચા કરીને મંજૂરીનો અંતિમ નિર્ણય લેવાશે. દરખાસ્તમાં પૂર્વ ઝોનમાં સિવિલ કામો, રસ્તા સુધારણા, વરસાદી ચેનલ, ઝાડોની કાપણી, ઢોર ડબ્બાની સંભાળ તેમજ ઝુના પ્રાણીઓ માટે ચારો ખરીદીના કામોનો સમાવેશ થાય છે. સાથે સાથે કેટલાક જૂના કન્સલ્ટન્ટના કરાર પૂર્ણ થતાં નવી એજન્સીઓની નિમણૂક કરવા માટે પણ દરખાસ્ત રજૂ થઈ છે. જમીન મિલ્કત શાખા દ્વારા રજૂ દરખાસ્ત મુજબ સુભાનપુરા ટી.પી. સ્કીમ નં. 02 માં પોષણ યોજના માટે અક્ષયપાત્ર સંસ્થાને કેન્દ્રિય રસોડા માટેની જમીન ફરી પાંચ વર્ષ માટે રૂ. 1 પ્રતિ ચો.મી. ટોકન ભાડે આપવાની ભલામણ છે. બિલ્ડિંગ પ્રોજેક્ટ શાખાએ અગાઉ મુલતવી રાખાયેલ રૂપિયા પાંચ કરોડની મર્યાદાવાળી દરખાસ્ત ફરી રજૂ કરી છે. અત્યાર સુધીના વાર્ષિક ઈજારામાં રૂ. 1.25 કરોડનો વધારો કરવાની ભલામણ કમિશ્નર તરફથી કરવામાં આવી છે.
શ્રી સયાજીબાગ ઝુ વિભાગના પ્રાણીઓ માટે મગફળી અને સુકું ઘાસ જેવી વસ્તુઓ રૂ. 20.59 લાખના ખર્ચે ખરીદવા માટે ચિંતન સપ્લાયર્સ પાસેથી 22.73% ઓછા દરે ખરીદી કરવાની ભલામણ છે. મારૂતિ એન્ટરપ્રાઇઝ તરફથી રજૂ કરાયેલા 12.88% ઓછા દરે યૂનિટ રેટને મંજૂરી આપવા માટે કમિશ્નર તરફથી ભલામણ છે. સાઇનગરના ટી.પી. રસ્તે નવી વરસાદી ચેનલ બનાવવા માટે રૂ. 71.50 લાખના કામ માટે રત્નદીપ ઈન્ફ્રાસ્ટ્રક્ચરને ઇજારો આપવા ભલામણ કરાઈ છે. ઓએસીસ એન્ટરપ્રાઇઝ પાસેથી રૂ. 1.5 કરોડ સુધીની ટ્રીમીંગ, ડિવાઇડર મેન્ટેનન્સ અને અર્બન ફોરેસ્ટ માટે સાધનો અને માનવશક્તિ પૂરાં પાડવાની દરખાસ્ત મંજૂરી માટે રજૂ કરાઈ છે. ફલાયઓવર, રેલ્વે ઓવરબ્રીજ અને કલ્વર્ટ જેવા કામો માટે નવા 3 કન્સલ્ટન્ટ સાથે પેનલ બનાવી આગળની કામગીરી માટે સત્તા મ્યુનિસિપલ કમિશ્નરને સોંપવાની ભલામણ કરાઈ છે. અગાઉના કસાડ કન્સલ્ટન્ટ અને પંકજ પટેલ કન્સલ્ટન્ટના કરાર જુલાઈમાં પૂર્ણ થઈ રહ્યા છે. પાલિકા હસ્તકના ચાર ઢોર ડબ્બાની તમામ કામગીરી હવે આઉટસોર્સિંગથી ચલાવવાનો નિર્ણય લેવામાં આવી રહ્યો છે. દવા, ઘાસચારો, ટેગિંગ, સારવાર સહિતની કામગીરી માટે રૂ. 4 કરોડના ખર્ચની દરખાસ્ત સ્થાયી સમિતિ સમક્ષ રજૂ કરાઈ છે.
