શહેરના વાતાવરણમાં ઠંડક પ્રસરતા શહેરીજનોને ઉકળાટભર્યા વાતાવરણથી રાહત
હવામાન વિભાગ દ્વારા આગામી તા.02 ઓગસ્ટ સુધી છૂટાછવાયા ભારે વરસાદની આગાહી
(પ્રતિનિધિ) વડોદરા તા.29
શહેરમાં મંગળવારે દિવસ દરમિયાન વાદળછાયું વાતાવરણ જોવા મળ્યું હતું સાથે જ મહત્તમ તાપમાનમાં ઘટાડો જોવા મળ્યો હતો જેના કારણે વાતાવરણમાં ઠંડક પ્રસરી જવા પામી છે. શહેરમાં મંગળવારે મહત્તમ તાપમાન 28.4 ડિગ્રી સેલ્સિયસ નોંધાયું હતું જ્યારે હવામાં ભેજનું પ્રમાણ વધતાં 84% જેટલું રહેવા પામ્યું હતું.
રાજ્યમાં હાલ ચાર વરસાદી સિસ્ટમ સક્રિય રહી છે તથા બંગાળની ખાડી પર સર્જાયેલા લો પ્રેશરને કારણે ગત શનિવાર સાંજથી રાજ્યમાં સાર્વત્રિક વરસાદ વરસી રહ્યો છે જેમાં દક્ષિણ ગુજરાત અને મધ્ય ગુજરાતના કેટલાક ભાગોમાં તો ભારે વરસાદ વરસ્યો છે ત્યારે મંગળવારે વડોદરા શહેર જિલ્લામાં મેઘ વિરામને પગલે વાદળછાયું વાતાવરણ જોવા મળ્યું હતું. ગત શનિવારે સાંજથી સોમવારે રાત સુધી ધીમી ધારે અવિરત વરસાદ વરસ્યો હતો જેના કારણે વાતાવરણમાં બદલાવ આવ્યો હતો અને વાતાવરણમાં ઠંડક પ્રસરી જવા પામી હતી. વડોદરા શહેરમાં ચોમાસાની ઋતુમાં મંગળવાર સુધીમાં મોસમનો કુલ વરસાદ 22 ઇંચ થી વધુ નોંધાયો છે. હવામાન વિભાગ દ્વારા આગામી તા 02 ઓગસ્ટ સુધી દક્ષિણ ગુજરાત અને મધ્ય ગુજરાત તથા સૌરાષ્ટ્રના ભાગોમાં છૂટાછવાયા ભારે વરસાદની આગાહી કરી છે. વડોદરા શહેરમાં તથા જિલ્લામાં મંગળવારે એકંદરે વાદળછાયું વાતાવરણ જોવા મળ્યું હતું જ્યારે બીજી તરફ મહત્તમ તાપમાન 28.4 ડિગ્રી સેલ્સિયસ રહ્યું હતું સાથે લઘુત્તમ તાપમાન 25.8 ડિગ્રી સેલ્સિયસ નોંધાયું હતું જ્યારે હવામાં ભેજનું પ્રમાણ 84% જેટલું રહેવા પામ્યું હતું.
શહેરના જળાશયોની જળસપાટી રાત્રે 8 વાગ્યા સુધીમાં (ફૂટમાં)
આજવા ડેમ 211.59 ફૂટ
પ્રતાપપુરા ડેમ 223.02 ફૂટ
વિશ્વામિત્રી નદીની વિવિધ સ્થળોની જળસપાટી રાત્રે 8 વાગ્યા સુધીમાં (ફૂટમાં)
અકોટા બ્રિજ 14.80 ફૂટ
બહુચરાજી બ્રિજ 1.39 ફૂટ
કાલાઘોડા બ્રિજ 11.68 ફૂટ
મંગલ પાંડે બ્રિજ 13.00 ફૂટ
મુજમહુડા બ્રિજ 13.30 ફૂટ
સમા -હરણી બ્રિજ 13.77 ફૂટ
વડસર બ્રિજ 11.53 ફૂટ
