જાહેર માર્ગને ખાનગી સંપત્તિ બનાવવાનો પ્રયાસ નિષ્ફળ; દબાણ શાખાની કાર્યવાહીથી સ્થાનિકોમાં ખુશી
વડોદરા શહેરના ગોત્રી પશ્ચિમ વિસ્તારમાં વોર્ડ નંબર 11ની કચેરીની આસપાસના મુખ્ય રસ્તા પર થયેલા ગેરકાયદે દબાણને દૂર કરવા માટે સોમવારે વડોદરા મહાનગર પાલિકા દ્વારા કડક કાર્યવાહી કરવામાં આવી હતી. બે જુદા-જુદા મકાન માલિકોએ જાહેર માર્ગ પર ગેરકાયદેસર રીતે બનાવેલી કુલ 150 ફૂટ જેટલી લાંબી કમ્પાઉન્ડ વોલ પર પાલિકાની દબાણ શાખાની ટીમે બુલડોઝર ફેરવીને રોડ-રસ્તા તાત્કાલિક ધોરણે ખુલ્લા કરાવ્યા હતા.
પ્રાપ્ત માહિતી અનુસાર, શહેરના ગોત્રી પશ્ચિમ વિસ્તારમાં આવેલી વોર્ડ ઓફિસની આસપાસના વિસ્તારમાં બે મકાન માલિકોએ પોતાની મિલકતની હદની બહાર જઈને જાહેર રોડ રસ્તા પર ગેરકાયદે કમ્પાઉન્ડ વોલનું નિર્માણ કર્યું હતું. આ દબાણને કારણે રસ્તાની પહોળાઈ ઘટી ગઈ હતી અને સ્થાનિક નાગરિકો તેમજ વાહનચાલકોને અવરજવરમાં ભારે મુશ્કેલીઓનો સામનો કરવો પડતો હતો. આ અંગે પાલિકા તંત્રને સતત ફરિયાદો મળી રહી હતી.
લોકોની ફરિયાદો અને જાહેર માર્ગ પરના ગેરકાયદે દબાણની ગંભીરતાને ધ્યાનમાં રાખીને, પાલિકા કમિશનરના આદેશ અનુસાર દબાણ શાખાની ટીમે તાત્કાલિક કાર્યવાહી હાથ ધરી હતી. ટીમ બુલડોઝર જેવા સાધનો સાથે ઘટનાસ્થળે પહોંચી હતી. કોઈપણ જાતના વિલંબ વિના, આ બંને ગેરકાયદેસર કમ્પાઉન્ડ વોલ તોડી પાડવામાં આવી હતી. અંદાજે 150 ફૂટ જેટલું લાંબુ દબાણ દૂર કરીને જાહેર રસ્તાઓને પુનઃ ખુલ્લા કરવામાં આવ્યા હતા, જેના પગલે સ્થાનિકોએ પાલિકાની આ કામગીરીને આવકારી હતી.
પાલિકા તંત્ર દ્વારા કરવામાં આવેલી આ ઝડપી કાર્યવાહીથી જાહેર રસ્તા પર દબાણ કરનારા અન્ય લોકો માટે પણ એક સ્પષ્ટ સંદેશ પહોંચાડાયો છે કે, જાહેર માર્ગો પર કોઈપણ પ્રકારનું ગેરકાયદે બાંધકામ કે દબાણ ચલાવી લેવામાં આવશે નહીં.
