વેજલપુરમાં ચૂંટણી પૂર્વે પોલીસનો લોકદરબાર: DYSPનું માર્ગદર્શન, શાંતિપૂર્ણ મતદાન માટે અપીલ

Share

Tweet

Share

Share

Email

Comments

🔹 આચારસંહિતા પાલન અને કાયદો-વ્યવસ્થા જાળવવા કડક સૂચનાઓ
🔹 સાયબર ફ્રોડથી સાવધાન રહેવા અને ટ્રાફિક નિયમોનું પાલન કરવા ગ્રામજનોને સમજણ
(પ્રતિનિધિ) કાલોલ, તા. 13
સ્થાનિક સ્વરાજ્યની ચૂંટણીઓ નજીક આવતાં પંચમહાલ જિલ્લાના વેજલપુર ગામે સુરક્ષા વ્યવસ્થા મજબૂત બનાવવા ગ્રામ પંચાયત કચેરી ખાતે કાલોલના ડીવાયએસપી નવીન આહીર તથા વેજલપુર પોલીસ સ્ટેશનના પી.આઈ. એ.આઈ. ભરવાડની અધ્યક્ષતામાં લોકદરબારનું આયોજન કરવામાં આવ્યું હતું. કાર્યક્રમનો મુખ્ય હેતુ ચૂંટણી દરમિયાન ગામમાં શાંતિ, એકતા અને ભાઈચારો જળવાઈ રહે તે સુનિશ્ચિત કરવાનો હતો.

લોકદરબારમાં DYSP નવીન આહીરે ગ્રામજનો અને ઉમેદવારોને સંબોધતા જણાવ્યું હતું કે લોકશાહીના આ પર્વમાં દરેક નાગરિક નિર્ભય બની મતદાન કરે તે પોલીસ તંત્રની પ્રાથમિકતા છે. ચૂંટણી દરમિયાન આચારસંહિતાનો ભંગ ન થાય અને કાયદો-વ્યવસ્થા જળવાઈ રહે તે માટે કડક સૂચનાઓ પણ આપવામાં આવી હતી. સોશિયલ મીડિયામાં ફેલાતી ભ્રામક અફવાઓથી દૂર રહેવા અને શાંતિ ભંગ કરનારા તત્વો સામે કડક કાર્યવાહી કરવાની ચેતવણી આપવામાં આવી હતી.
આ પ્રસંગે DYSP નવીન આહીરે ગ્રામજનોને વધતા સાયબર ગુનાઓથી સાવચેત રહેવા માર્ગદર્શન આપ્યું હતું. અજાણ્યા લોકો સાથે OTP શેર ન કરવા તથા શંકાસ્પદ લિંક્સથી દૂર રહેવા અપીલ કરી હતી. કોઈ સાયબર ગુનાનો ભોગ બન્યે તાત્કાલિક 1930 હેલ્પલાઇન પર સંપર્ક કરવા જણાવ્યું હતું. સાથે જ PI એ.આઈ. ભરવાડે ટ્રાફિક નિયમોનું પાલન, હેલ્મેટનો ઉપયોગ, લાયસન્સ સાથે રાખવા અને બિનજરૂરી પાર્કિંગ ટાળવા અંગે સમજણ આપી હતી.
તેમણે વધુમાં જણાવ્યું હતું કે ચૂંટણી દરમિયાન પોલીસ તંત્ર સંપૂર્ણપણે સજ્જ છે અને અસામાજિક તત્વો સામે કડક કાર્યવાહી કરવામાં આવશે તેમજ સંવેદનશીલ વિસ્તારોમાં વિશેષ પેટ્રોલિંગ રાખવામાં આવશે. આ લોકદરબારમાં ગામના અગ્રણીઓ, યુવાનો અને મોટી સંખ્યામાં ગ્રામજનો ઉપસ્થિત રહ્યા હતા, જેના કારણે પોલીસ અને પ્રજા વચ્ચે વિશ્વાસનું વાતાવરણ વધુ મજબૂત બન્યું છે.

રિપોર્ટર: વીરેન્દ્ર મહેતા