ઇજાગ્રસ્ત મહિલાનો ધ્રુજારી ઉપજાવે તેવો અનુભવ: “ચા બનાવવા ઊભી થઈ ત્યાં જ ધાબુ તૂટ્યું, ચાર ટાંકા આવ્યા”, મોટી જાનહાનિ ટળી
વડોદરા શહેરના કિશનવાડી વિસ્તારમાં આવેલા વુડા દ્વારા નિર્મિત આવાસ યોજનાના મકાનોની જર્જરિત હાલતનો વધુ એક કિસ્સો સામે આવ્યો છે. આવાસ યોજનાના એક મકાનની છતનો સ્લેબ અચાનક તૂટી પડતા વિસ્તારમાં ભારે અફરાતફરી મચી ગઈ હતી. આ ઘટનાથી મકાનોની નબળી ગુણવત્તા અને સમારકામના અભાવની પોલ ખુલ્લી પડી છે. આ આવાસ યોજનાના મકાનો આશરે 15 વર્ષ પહેલાં જ બનાવવામાં આવ્યા હતા, તેમ છતાં તેમની હાલત અત્યંત જર્જરિત થઈ ગઈ છે.
છત તૂટવાની આ ઘટનામાં મકાનમાં રહેતા દંપતી પર સીધો સ્લેબ પડ્યો હતો. જોકે, ગંભીર ઇજા થતાં પહેલાં જ દંપતીનો સદનસીબે ચમત્કારિક બચાવ થયો હતો. છતનું માત્ર પ્લાસ્ટર જ નહીં, પરંતુ મોટો સ્લેબનો ભાગ તૂટી પડતાં આ ઘટનાની ગંભીરતા વધી ગઈ હતી. આ ઘટનાએ રહેવાસીઓમાં ગંભીર ભય પેદા કર્યો છે. લોકોનું કહેવું છે કે જો દિવસ દરમિયાન આ ઘટના બની હોત કે બાળકો આસપાસ રમતા હોત, તો મોટી જાનહાનિ થઈ શકી હોત. વુડા દ્વારા નિર્મિત આ આવાસ યોજનાના મકાનોની અત્યંત જર્જરિત હાલતને કારણે રહેવાસીઓમાં ભારે ફફડાટ ફેલાયેલો છે. 15 વર્ષના ટૂંકા ગાળામાં જ મકાનો રહેવાલાયક ન રહે અને છત તૂટવા લાગે તે વુડાના બાંધકામની ગુણવત્તા અને સમારકામની નિષ્ક્રિયતા સામે ગંભીર સવાલો ઊભા કરે છે. રહેવાસીઓએ તાત્કાલિક ધોરણે તમામ જર્જરિત મકાનોનું સમારકામ કરવા અને આવાસોની સુરક્ષા સુનિશ્ચિત કરવા માટે વુડા અને સ્થાનિક સત્તાવાળાઓ સમક્ષ માંગણી કરી છે, જેથી ભવિષ્યમાં કોઈ મોટી દુર્ઘટના ન બને.
અમે પાંચ ચોથા માળ ઉપર રહીએ છીએ પાછળના રૂમમાં બેઠી હતી. મારા પતિ ન્હાઈ બહાર આવી તૈયાર થઈ રહ્યા હતા અને મને ચા બનાવવાનું કહ્યું હતું અને મેં ઊભી થઈ અને ચા બનાવવા માટે જઈ રહી હતી અને અચાનક ઉપરથી ધાબુ તૂટી પડ્યું હતું. લાગતું જ ન હતું. ત્યાં ધાબુ તૂટી જશે. માથામાં મને વાગ્યું છે ચાર ટાંકા આવ્યા છે અને પાછળ પીઠના ભાગે અને પગના ભાગે ઈજા પહોંચી છે અને મારા પતિને પણ પગમાં અને માથામાં વાગ્યું છે : રોમાબેન, ઈજાગ્રસ્ત
