વિડીયો વાયરલ થયાં બાદ પોલીસે જાહેરનામા ભંગ બદલ ચારની ધરપકડ કરી
(પ્રતિનિધિ) આણંદ તા.8
શિક્ષણનગરી વિદ્યાનગરમાં છેલ્લા કેટલાક સમયથી પીધેલા કેટલાક યુવકો અને માથાભારે શખ્સો દ્વારા વારંવાર ભય ફેલાવતી પ્રવૃત્તિ આચરવામાં આવે છે. જેમાં જાહેરમાં કેક કાપી જન્મ દિવસ ઉજવી ફટાકડાં ફોડી હોબાળો મચાવવા બાબતે પોલીસે કુલ છ વ્યક્તિ સામે ગુનો નોંધી ચારની ધરપકડ કરી છે.
વિદ્યાનગરમાં મોડી રાત્રિના સમયે છરીથી કેક કાપી ફટાકડા ફોડી બર્થ ડે ઉજવતો વીડીયો વાયરલ થયો હતો. જે અનુસંધાને પોલીસે જાહેરનામા ભંગનો ગુનો દાખલ કરી વિડીયોમાં ઓળખાયેલા શખ્સો સામે કાર્યવાહી હાથ ધરી છે. આ અંગે તપાસ દરમિયાન વિદ્યાનગરમાં રૂદ્રાક્ષ કોર્નર ખાતે છઠ્ઠી નવેમ્બરના રોજ જન્મ દિવસની ઉજવણી માટે છરીથી કેક કાપી ફટાકડા ફોડવામાં આવ્યાં હતાં. જેના વિડીયો આધારે પોલીસ ઇન્સ્પેક્ટર ડી.આર. ગોહિલ સહિતની ટીમે ઓળખ કરતાં છ વ્યક્તિ ઓળખાયાં હતાં. જે સંદર્ભે બાથા ઉર્ફે ડાકરો લાખા ભરવાડ (રહે. વિદ્યાનગર), ભરત ઉર્ફે બીજલી પેથા સોલંકી (રહે. વિદ્યાનગર), ધ્રુવ હિતેષ પટેલ (રહે. પાલિકાનગર, આણંદ) અને ચેતન ઉર્ફે રોહન સુરેશ રાઠોડ (રહે. વિદ્યાનગર)ની ધરપકડ કરવામાં આવી હતી. જ્યારે રોહિત ભરત બામ્બા અને સુરેશ દાના ભરવાડ ભુગર્ભમાં ઉતરી ગયાં હતાં. જેમને પકડવા પોલીસે તજવીજ હાથ ધરી છે.
