વિદ્યાર્થિનીના દાદા પણ વાયુસેનામાં હતા,નાનપણથી વાયુ સેનામાં જોડાવાનું સ્વપ્ન આજે પૂર્ણ થયું :
વાઈસ ચાન્સેલર દ્વારા વિદ્યાર્થિની યાશીકા ખત્રીનું બહુમાન કરાયું :
( પ્રતિનિધિ )વડોદરા,તા.19
એમએસ યુનિવર્સિટીની આર્ટસ ફેકલ્ટીમાં અભ્યાસ કરતી વિદ્યાર્થિની યાશીકા ખત્રીએ એનસીસીની મદદથી અન્ય જરૂરી અભ્યાસ પૂર્ણ કરી ભારતીય વાયુ સેનામાં એન્ટ્રી કરી છે. ભારતીય વાયુસેનામાં યાશીકાની પાયલોટ તરીકે પસંદગી થતા પરિવાર અને યુનિવર્સિટીનું ગૌરવ વધાર્યું છે. ત્યારે યુનિવર્સિટીના વીસી દ્વારા યાશીકાનું બહુમાન કરવામાં આવ્યું હતું.
વિશ્વ વિખ્યાત વડોદરાની મહારાજા સયાજીરાવ યુનિવર્સિટીની આર્ટસ ફેકલ્ટીની વિદ્યાર્થીની ભારતીય વાયુસેનામાં પાયલોટ બનતા એમ.એસ.યુનિવર્સિટીના ઇતિહાસમાં વધુ એક યશ કલગીનો ઉમેરો થયો છે. મહારાજા યુનિવર્સિટીની આર્ટસ ફેકલ્ટીમાં અભ્યાસ કરતી યાશીકા ખત્રી સંરક્ષણ અને રાષ્ટ્રીય સુરક્ષાના પ્રથમ અભ્યાસક્રમની વિદ્યાર્થિની હતી. તેણીએ એનસીસીની મદદથી અન્ય બીજા અભ્યાસક્રમોને સફળતાપૂર્વક પાર કરી ભારતીય વાયુસેનામાં પાયલોટ તરીકે એન્ટ્રી લીધી છે. જે એમ.એસ.યુનિવર્સિટીના ઇતિહાસમાં ગૌરવપૂર્ણ બાબત ગણી શકાય તેમ છે. ભારતીય વાયુસેનામાં પાયલોટ તરીકે પસંદગી થનારી યાશીકા ખત્રીના દાદા પણ ભારતીય વાયુસેનામાં હતા. જેથી નાનપણથી યાશીકાનું વાયુસેનામાં જોડાવાનું સપનું રહ્યું છે. જે ભારે મહેનત બાદ ભારતીય વાયુસેનામાં પાયલોટ તરીકે યાશીકા પસંદગી પામી છે. આ બાબતે યાશીકાના માતા સપના ખત્રીએ પણ એક માતા માટે આ બાબત ગૌરવપૂર્ણ હોવાનું જણાવ્યું હતું. આજે વાઈસ ચાન્સેલર ડો. વિજયકુમાર શ્રીવાસ્તવ દ્વારા યાશીકા ખત્રીનું બહુમાન કરવામાં આવ્યું હતું
