વડોદરા તારીખ 6
વડોદરાના સાકરદા ગામ પાસે આવેલી કંપનીમાં ઇન્ડિયન ટોબેકો કંપનીના લોગોવાળી ડુપ્લીકેટ સિગારેટનું ઉત્પાદન થતું હતું. જેથી કોલકાતાની કંપનીના માણસે લેબર કમિશનર અને એસ.ઓજી પોલીસને સાથે રાખી કંપનીમાં રેડ કરી હતી. ત્યારે રૂ.5.40 લાખની સિગારેટ સહિત રૂ.5.52 લાખનો મુદામાલ કબ્જે કરી ત્રણ ડાયરેક્ટર વિરુદ્ધ નંદેસરી પોલીસ સ્ટેશનમાં કોપી રાઈટ એકટ હેઠળ ગુનો નોંધાયો છે.
ઇન્ડીયન ટોબેકો કંપની લીમીટેડ (આઇ.ટી.સી.) કંપની જેની રજીસ્ટર્ડ ઓફિસ વર્જીનીયા હાઉસ, જવાહરલાલ નહેરુ રોડ, કોલકતા ખાતે આવેલી છે. ઓક્ટોબર 2024 માં કંપનીને માહિતી મળી હતી કે નવી દિલ્હીમાં કાલુરામ ગંગારામ બંટી સિગારેટ દુકાનમાં કંપનીની સિગારેટ જેવા નામ અને લોગો વાળી ડુપ્લીકેટ સિગારેટનુ વેચાણ થાય છે અને આ ડુપ્લીકેટ સિગારેટનું ઉત્પાદન એટલાન્ટીસ ટોબેકો પ્રા.લિ. કંપની, વીટીવી કંપનીની પાછળ સાંકરદા વડોદરા ખાતે થાય છે. જેથી કંપનીએ એટલાન્ટીસ ટોબેકો પ્રા .લિ. કંપની વિરુદ્ધમાં હાઈકોર્ટ ઓફ દિલ્હીમાં સિવિલ કેસ દાખલ કરતા કોર્ટે લોકલ કમિશ્નર તરીકે જશબીર બીધૂડીની નિમણૂંક કરી હતી. ઇન્ડિયન ટોબેકો કંપનીના માણસે લોકલ કમિશનર અને એસ.ઓ.જી પોલીસની સાથે રાખીને સાંકરદા ખાતે આવેલી એટલાન્ટીસ ટોબેકો કંપનીમા રેડ કરી હતી. ત્યારે સિગારેટ બનાવવાની કામગીરી ચાલુ હતી અને આશરે 20 જેટલા માણસો કામ કરતા હતા. કંપનીની ઓફિસમા કંપનીના ડાયરેક્ટર હરીશ પંચાલ તથા વેદાંત પંચાલ હાજર હોય તેમને સાથે રાખી તપાસ કરી હતી ત્યારે ગોડાઉનમાથી રૂ. 5.40 લાખની ડુપ્લીકેટ કાઉન્ટરહીટ સિગારેટ, તેમની કંપનીના ટ્રેડમાર્કને મળતા ડીઝાઈન વાળા ગોલ્ડ ટિપ અને ગોલ્ડ સ્ટીકના લોગો છાપેલા ખોખા રૂ.10 હજાર, ગોલ્ડ ટીપ લખેલા કાર્ટુન મળી રૂ. 5.52 લાખનો મુદામાલ કબ્જે કબજે કરીને કંપનીના ડાયરેક્ટર હરીશ સના પંચાલ, વેદાંત રાકેશ પંચાલ અને હસમુખ મફતલાલ પંચાલ વિરુદ્ધ નંદેસરી પોલીસ સ્ટેશનમાં કોપી રાઈટ હેઠળ ગુનો નોંધવામાં આવ્યો છે.
