પ્રતિનિધિ વડોદરા તા.15
ધોરણ 11માં અભ્યાસ કરતી 16 વર્ષીય સગીરાના શારીરિક અપડલા કરનાર સ્કૂલ રિક્ષાના ચાલકની પોલીસે ધરપકડ કરી લીધી હતી. પોલીસે આરોપીને કોર્ટમાં રજૂ કરતા કોર્ટે તેને જ્યુડિશિયલ કસ્ટ્ડીમાં મોકલી આપ્યો હતો.
વડોદરા શહેરના કલાલી વિસ્તારમાં રહેતી અને ધોરણ 11માં અભ્યાસ કરતી 16 વર્ષીય સગારાને છેલ્લા ઘણા મહિનાથી તેના દાદા સ્કૂલમાં લેવા મુકવા માટે જતા હતા. પરંતુ પંદર દિવસથી તેની માતાએ સગીરાની સ્કૂલ માટે રિક્ષા નક્કી કરી હતી. રિક્ષામાં બે બાળકો અને સગીરા સહિત અન્ય વિદ્યાર્થી શાળાએ જતા હતા. દરમિયાન પાડોશમાં રહેતા બે બાળકો શાળાએ નહી જતા સગીરાને રિક્ષા ચાલક ઘનશ્યામ રામસિંગ ગોહિલ સ્કૂલમાં લઇ ગયો હતો. બપોરે છુટ્યા બાદ પરત સગીરાને ઘરે મુકવા માટે આવતો હતો. ત્યારે રિક્ષામાં એકલી બેઠેલી સગીરાની એકલતાનો લાભ ઉઠાવીને ચાલકે શારીરિક અડપલા કર્યા બાદ બીભત્સ માગણી પણ કરી હતી. રિક્ષામાંથી ઉતર્યા બાદ કપડા બદલતી વેળા દીકરીએ માતાને રડતા રડતા રિક્ષા ચાલકે કરેલી કરતૂત અંગે જાણ કરી હતી. ત્યારે માતાએ અટલાદરા પોલીસ સ્ટેશનમાં રિક્ષા ચાલક વિરુદ્ધ ફરિયાદ નોંધાવી હતી. જેથી પોલીસે રિક્ષા ચાલકની ધરપકડ કરી હતી. ત્યારબાદ કોર્ટમાં રજૂ કરતા કોર્ટે તેને જ્યુડિશિયલ કસ્ટડીમાં મોકલી આપવા હુકમ કર્યો હતો.
