જાહેરાતમાં વિલંબથી કાર્યકરો અને નેતાઓ વચ્ચે ચર્ચાઓનો માહોલ
વડોદરા શહેર અને જિલ્લામાં ભાજપના પ્રમુખ પદ માટે રાજકીય ગરમાવો વધી રહ્યા છે. તાજેતરમાં કેન્દ્રીય ગૃહ મંત્રી અમિત શાહના ગુજરાત પ્રવાસ દરમ્યાન શહેર અને જિલ્લા પદના નામોની જાહેરાતની અપેક્ષાઓ હતી, પરંતુ હજુ સુધી કોઈ જાહેરાત કરવામાં આવી નથી. આ વિલંબને કારણે ભાજપના કાર્યકરો અને નેતાઓમાં ભારે ઉત્સુકતા અને અશાંતિ જોવા મળી રહી છે.
ગુજરાતમાં ભારતીય જનતા પાર્ટીના રાષ્ટ્રીય અધ્યક્ષ જગતપ્રકાશ નડ્ડા પણ ગુજરાતની મુલાકાતે આવ્યા છે અને મુખ્યમંત્રી ભૂપેન્દ્ર પટેલે તેમની સાથે શિષ્ટાચાર મુલાકાત કરી હતી. આ મુલાકાત પછી, ઘણા મતો છે કે શહેર અને જિલ્લાના પ્રમુખ પદ માટેની જાહેરાત ટૂંક સમયમાં થઈ શકે છે.
વડોદરા શહેરમાં પ્રમુખ પદ માટે તીવ્ર સ્પર્ધા છે. અનેક નેતાઓ દિલ્હી સુધી પહોંચીને પોતાની ઉમેદવારી માટે લોબીંગ કરી રહ્યા છે. સૂત્રોના અનુસાર, કેટલાક મહાનગર અને જિલ્લા પ્રમુખોને વધુ એક ટર્મ માટે રીપીટ કરવામાં આવી શકે છે, પરંતુ શહેરમાં વર્તમાન પ્રમુખ સામે વિરોધના કારણે આ નિર્ણય લંબાવાયો હોવાનું પણ ચર્ચાઈ રહ્યું છે. શહેરના જ કેટલાક સિનિયર નેતાઓએ ખુલીને વર્તમાન પ્રમુખનો વિરોધ કરી ચૂક્યા છે.
શહેરના ઘણા નેતાઓને એવી પણ લાગણી છે કે પ્રમુખ પદ પર કેટલાક નવા ચહેરાઓને લાવવામાં આવે. પ્રમુખોની જાહેરાતમાં વિલંબથી શહેર અને જિલ્લા પ્રમુખની પસંદગીને કારણે પ્રદેશ પ્રમુખની નિમણૂકમાં પણ વિલંબ થવાની સંભાવના છે. આ પદની પસંદગી અંગેની રાજકીય ઉથલપાથલ હવે સરકાર અને પાર્ટી કાર્યકરો વચ્ચે વધુ રસદાર બની રહી છે. હવે જોવું રહેશે કે ભાજપ પોતાની આગામી જાહેરાત ક્યારે કરે છે અને આ પદ માટે કોની પસંદગી થાય છે.
