દૂરથી દ્રશ્યો જોઈ પસાર થઈ રહેલા સબ ફાયર ઓફિસર દોડી આવ્યા :
રહેણાંક મકાનમાંથી પાણીના ફુવારા વડે આગ બુઝાવવા પ્રયાસ :
( પ્રતિનિધિ )વડોદરા,તા.7
વડોદરાના કારેલીબાગ વિસ્તારમાં વિજ ડીપી પાસે આગ લાગવાની ઘટના બની હતી. એકાએક આગે વિકરાળ સ્વરૂપ લેતા ધૂમાડાના ગોટે ગોટા નીકળ્યા હતા. દરમિયાન ભાયલી ફાયર સ્ટેશનના સબ ઓફિસર પસાર થતા હોવાથી તેમનું ધ્યાન ગયું હતું. અને બાદમાં તેઓ તુરંત સ્થળ પર આવી પહોંચ્યા હતા. તેમણે આગ નજીકની ખુરશીઓ અને લારીઓ દુર કરી દીધી હતી. જેથી આગને પ્રસરતા અટકાવી શકાઈ હતી. બીજી તરફ નજીકના ઘરમાંથી પાણીનો પાઇપ મેળવીને આગ પર કાબુ મેળવવાના પ્રયત્નો તેમણે કર્યા હતા.
વડોદરાના કારેલીબાગમાં વિસ્તારમાં પાણીની ટાંકી રોડ પર વીજ ડીપી પાસે વિજ થાંભલા નીચે કચરામાં આગ લાગી હતી, જેણે જોતજોતામાં મોટું સ્વરૂપ ધારણ કર્યું હતું. જો કે, આ દરમિયાન પાલિકાના સબ ફાયર ઓફિસર નજીકમાંથી પસાર થઇ રહ્યા હતા. ઘટના તેમના ધ્યાને આવતા તેઓ તાત્કાલિક દોડીને આવ્યા હતા. અને આગને વધુ ફેલાતી અટકાવવાની સાથે તેના પર કાબુ મેળવવાના પ્રયત્નો તેજ કરી દીધા હતા. ભાયલી ફાયર સ્ટેશનના સબ ફાયર ઓફિસર નંદકિશોરભાઇ સોલંકી મીડિયાને જણાવ્યું કે, આ કારેલીબાગ વિસ્તારમાં આવેલી વિજ કંપનીની ઓફિસ છે. અહિંયા થાંભલા પર જાડા કેબલના વાયરો હતા. ત્યાં કચરો અને થેલા પડ્યા હતા. અહિંયા ધુમ્રપાન અથવા તો તાપણું કરવાના કારણે આગ લાગી ગઇ હોવાનું અનુમાન છે. આગ બરાબર લાગી ગઇ હતી. મેં દુરથી ધૂમાડા જોયા હતા. છેક ચાર રસ્તા સુધી ધૂમાડા દેખાતા હતા. જેથી હું દોડીને આવી ગયો હતો. આગ બરાબર જામી રહી હતી. નજીકમાં એક ભાઇ પાણી છાંટી રહ્યા હતા. તેમની પાસેથી તે લઇને આગ બુઝાવવાની કામગીરી કરી હતી. સાથે જ લારીઓ-ખુરશીઓ દુર કરી હતી. અમે આગ ઓલવી દીધી હતી.
