ઉદ્યોગપતિને તથા તેમના પરિવારને પતાવી દેવાની ગર્ભિત ધમકી ભર્યો ઈમેઈલ મળતા ચકચાર
ધમકી આપનારે ઈ મેઈલમાં શું લખ્યું : ‘આઈ વિલ ડિસ્ટ્રોય યતીન એન્ડ હિઝ ફેમિલી, વેરી સુન ઈફ હી ડિડન્ટ રિઝાઈન ફોમ પોઝિશન ઓફ ચેરમેન’,
વડોદરા તા.3
વડોદરા શહેરના ભાયલી વિસ્તારમાં રહેતા વર્ડ વિઝાર્ડ કંપનીના ચેરમેન અને જાણીતા ઉદ્યોગપતિ યતીન સંજયભાઈ ગુપ્તેને અજાણી વ્યકિત દ્વારા કંપનીના સંચાલક પદેથી રાજીનામું આપવા માટે અને જો રાજીનામું નહી આપે તો તેમને તથા તેમના પરિવાર સહિત પતાવી દેવાની ધમકી આપતા ઈ-મેઈલ મોકલવામાં આવતા પરિવારમાં ભયનો માહોલ ફેલાયો છે. જેના કારણે ઉદ્યોગપતિએ વડોદરા સાયબર ક્રાઈમ સ્ટેશનમાં ફરિયાદ નોંધાવી છે. ઉદ્યોગપતિને ધમકી મળતા કોર્પોરેટ જગતમાં ચકચાર મચી જવા પામી છે. સાયબર ક્રાઈમ પોલીસે ગર્ભિત ધમકી ભર્યો મેલ મળ્યો હોય તેના આઈડીની તપાસ શરૂ કરાઇ છે.
વડોદરા શહેરના ભાયલી વિસ્તારમાં રાઈપુરા રોડ પર આવેલા બંગલામાં રહેતા 46 વર્ષીય યતીન સંજય ગુપ્તેએ સાયબર ક્રાઈમ સ્ટેશનમાં ફરિયાદ નોંધાવી હતી કે, હું આજવા રોડ પર આવેલી મારી કંપની વર્ડ વિઝાર્ડ મોબીલિટીમાં ચેરમેન અને મેનેજીંગ ડિરેકટર પદે કંપનીનું કામ સાંભળું છું. ગત 25 જાન્યુઆરીએ હું કંપનીમાં હાજર હતો તે સમયે મારા પર્સનલ ઈ-મેઈલ એડ્રેસ પર તે જ મેઈલ એડ્રેસથી તેમજ અમારી ઓફિસના બીજા એક મેઈલ એડ્રેસ પર પણ તે જ ઈ-મેઈલ એડ્રેસથી ઈ-મેઈલ મોકલવામાં આવ્યા હતા. જે ઈ મેઇલમાં જણાવ્યું હતું કે આઈ વિલ ડિસ્ટ્રોય યતીન એન્ડ હિઝ ફેમિલી વેરી સુન ઈફ હી ડિડન્ટ રિઝાઈન ફોમ પોઝિશન ઓફ ચેરમેન, આસ્ક હિમ ટુ રિઝાઈન આઈ કિલ હીમ, આઈ ઓલરેડી સ્ટાર્ટેડ માય પ્લાન, ફોર ડેમો યુ કેન સી કરંટ સિચ્યુએશન ઓફ યોર કંપની, આસ્ક હિમ ટુ રિઝાઈન અધરવાઈઝ હિ વીલ ફેસ મોર પ્રોબ્લેમ, નો વન કેન સેવ હીમ, ધીસ ઈસ નોટ અ જોક, ટેક ઈટ સિરિયસલી. આ ઇ મેઇલને ફેક સમજીને ઉદ્યોગપતિ યતીન ગુપ્તેએ તેની કોઈ નોંધ લીધી નહી. ત્યારબાદ 27 જાન્યુઆરીના રોજ તેઓ કંપનીમાં હાજર હતા. તે સમયે ફરીથી તેમના બીજા ઈ મેઈલ એડ્રેસ પરથી તે જ ઈ મેઈલ એડ્રેસ પર ફરીથી પહેલા આવેલો તે જ ગર્ભિત ધમકીભર્યો ઈ-મેઈલ મોકલામાં આવ્યો હતો. આ બાબતે પ્રાથમિક તપાસ માટે ચેરમેને શહેર પોલીસ કમિશનર કચેરીમાં રજુઆત કરી હતી. જેમાં બીજી વખત ધમકીભર્યા ઈ-મેઈલ આવતા તેમણે ધમકીભર્યા મેસેજ મોકલનાર શખ્સ વિરુધ્ધ સાયબર ક્રાઈમ સ્ટેશનમાં ફરિયાદ પણ નોંધાવી છે. અત્રે ઉલ્લેખનીય છે કે તાજેતરમાં ભાયલી અને સમાની નવરચનાની ત્રણ સ્કુલમાં બોંબ બ્લાસ્ટ કરવાનો ધમકીનો ઇ-મેઈલ મળ્યો હતો. ત્યારબાદ શહેરની ખાનગી હોટલને પણ બોમથી ઉડાવી દેવાની ધમકી ભર્યો ઈ-મેલ મળ્યો હતો. ત્યારબાદ હવે શહેરના જાણીતા ઉદ્યોગપતિને મારીના નાખવાનો ધમકી આપતો મેઈલ મળતા વડોદરા પોલીસમાં ફરી દોડધામ મચી ગઈ છે.
