દેશના ઇતિહાસમાં સૌથી વધુ સબ્સ્ક્રાઇબ થનારા બોન્ડની સફળતા
વડોદરા મહાનગરપાલિકાએ મ્યુનિસિપલ બોન્ડ ક્ષેત્રે ફરી એક વાર નવી સફળતા હાંસલ કરી છે. આજે સેબી (SEBI) દ્વારા આયોજિત નેશનલ વર્કશોપ “Pooling Financing and Be Market Ready for Municipal Corporations” દરમિયાન વડોદરા મહાનગરપાલિકાની સફળતા પર આધારિત “The Green Book” પુસ્તકનું વિમોચન કરવામાં આવ્યું હતું. આ પુસ્તક વડોદરા કોર્પોરેશન અને ડેલોઇટની ટીમના સહયોગથી તૈયાર કરવામાં આવ્યું છે. આ કાર્યક્રમમાં વડોદરાના મેયર, મ્યુનિસિપલ કમિશનર અરુણ મહેશ બાબુ, ડેપ્યુટી મેયર ચિરાગ બારોટ તથા સ્થાયી સમિતિ અધ્યક્ષ ડૉ. શીતલ મિસ્ત્રીની હાજર રહ્યા હતા. પુસ્તકનું વિમોચન અશ્વિની ભાટિયા (મેમ્બર, SEBI), પ્રમોદ રાવ અને વિવેક મિત્તલ (એક્ઝિક્યુટિવ ડિરેક્ટર, ડેલોઇટ) દ્વારા કરાયું હતું. વડોદરા મહાનગરપાલિકા એશિયાની એવી પ્રથમ મહાનગરપાલિકા બની છે જેણે ક્લાઈમેટ બોન્ડ સ્ટાન્ડર્ડ દ્વારા પ્રમાણિત રૂ.100 કરોડના ગ્રીન મ્યુનિસિપલ બોન્ડ ઇસ્યુ કર્યો. આ બોન્ડને ઇન્ડિયા રેટિંગ્સ એન્ડ રિસર્ચ લિમિટેડ દ્વારા “AA+/Stable” રેટિંગ આપવામાં આવ્યું છે. 1 માર્ચ 2024ના રોજ જ્યારે બોન્ડ ઇસ્યુ માટે BSEના ઇલેક્ટ્રોનિક પ્લેટફોર્મ પર સબ્સ્ક્રિપ્શન થયું ત્યારે માત્ર થોડા સમયમાં જ બોન્ડ 14.6 ગણો ઓવર-સબ્સ્ક્રાઇબ થયો હતો. કુલ 44 બિડરો દ્વારા રૂ.1460 કરોડની બીડ મેળવી, જે ભારતના મ્યુનિસિપલ બોન્ડ ઇતિહાસમાં સૌથી વધુ સબ્સ્ક્રિપ્શન ધરાવતું ઇસ્યુ બની રહ્યું છે.
વડોદરા કોર્પોરેશન દ્વારા જૂની સિદ્ધિ ટકાવી રાખવા માટે ગત વર્ષે પણ રૂ.100 કરોડના બોન્ડ દ્વારા નાણાં ઉગવવામાં આવ્યા હતા, જે અંગે “All About Municipal Bonds” નામની પુસ્તકની વિમોચન વિધિ યુ.એસ. એમ્બેસી, નવી દિલ્હી ખાતે 3 નવેમ્બર 2022ના રોજ યોજાઈ હતી. ત્યારબાદ નીતિ આયોગના CEO દ્વારા 9 મે 2023ના રોજ આ પુસ્તકને દેશભરના મુખ્ય સચિવો અને કેન્દ્રશાસિત પ્રદેશોના સલાહકારોને રેફરન્સ ડોક્યુમેન્ટ તરીકે મોકલવામાં આવ્યું હતું. “The Green Book” માં નફાકારક પરિયોજનાઓ માટે નાણાં કેવી રીતે ગ્રીન બોન્ડ દ્વારા મેળવવા તે અંગે વિગતવાર માર્ગદર્શન આપવામાં આવ્યું છે. વળી, આ પુસ્તકમાં ક્લાઈમેટ ફાઇનાન્સ, સેબી અને અન્ય નિયમનકારી માળખાની અનુપાલન પ્રક્રિયા સહિતની વિગતો રજૂ કરવામાં આવી છે. અન્ય શહેરો માટે પણ આ એક દિશાનિર્દેશક અને પ્રેરણારૂપ દસ્તાવેજ રૂપે સાબિત થઈ શકે છે.
