મતદાર યાદીની આખરી પ્રસિદ્ધિ 17 ફેબ્રુઆરીએ થવાની શક્યતા
9મી એ જિલ્લા કલેક્ટર સાથે બેઠક બોલાવવાનું આયોજન
વડોદરા | તા. 06 ફેબ્રુઆરી 2026
રાજ્યમાં વડોદરા મહા નગર પાલિકા સહિતની સ્થાનિક સ્વરાજની ચૂંટણીને લઈને તૈયારીઓ તેજ બની છે. મતદાર યાદી સુધારણા કાર્યક્રમ (SIR) પૂર્ણ થવા સાથે જ સ્થાનિક સ્વરાજ સંસ્થાઓની ચૂંટણી એપ્રિલ–મે માસ દરમિયાન યોજાય તેવી શક્યતા દેખાઈ રહી છે. રાજ્ય ચૂંટણી આયોગ દ્વારા આગામી દિવસોમાં તમામ જિલ્લા કલેક્ટરો સાથે બેઠક બોલાવી ચૂંટણી પ્રક્રિયા અંગે ચર્ચા કરવામાં આવશે.
મળતી માહિતી મુજબ, મતદાર યાદીની આખરી પ્રસિદ્ધિ તારીખ 17 ફેબ્રુઆરી 2026ના રોજ થવાની શક્યતા છે. ત્યારબાદ સ્થાનિક સ્વરાજ સંસ્થાઓ જેવી કે મહાનગરપાલિકા, જિલ્લા પંચાયત, તાલુકા પંચાયત અને નગરપાલિકાઓ માટેની ચૂંટણી પ્રક્રિયા આગળ વધશે.
રાજ્ય ચૂંટણી આયોગ દ્વારા જિલ્લાકક્ષાએ તમામ કલેક્ટરો સાથે વીડિયો કોન્ફરન્સના માધ્યમથી બેઠક યોજી ચૂંટણીની તૈયારીઓ, લોજિસ્ટિક વ્યવસ્થા અને મતદાન પ્રક્રિયા અંગે માર્ગદર્શન આપવામાં આવશે. SIR બાદ તૈયાર થયેલી મતદાર યાદી આધારે નવા વોર્ડ અને બેઠકોની રચનાની પ્રક્રિયા પણ પૂર્ણ થવાની છે.
ચૂંટણી પંચના અધિકારીઓના જણાવ્યા અનુસાર, સ્થાનિક સ્વરાજની ચૂંટણી માટે જરૂરી તમામ કામગીરી સમયસર પૂર્ણ કરવામાં આવશે. આ ચૂંટણીમાં મહાનગરપાલિકા, નગરપાલિકા, જિલ્લા પંચાયત અને તાલુકા પંચાયત માટે મતદાન યોજાશે.
રાજ્યભરમાં સ્થાનિક સ્વરાજની ચૂંટણીને લઈને રાજકીય પક્ષોમાં પણ ગતિવિધિઓ તેજ બની છે. ઉમેદવારોની પસંદગી, સંગઠન મજબૂત કરવાની પ્રક્રિયા અને પ્રચારની રણનીતિઓ પર કામ શરૂ થઈ ગયું છે.
મતદાર યાદી અંતિમ થતાં જ ચૂંટણીની સત્તાવાર તારીખોની જાહેરાત થવાની સંભાવના છે, જેને લઈ રાજકીય માહોલ ગરમાવાની પૂરી શક્યતા છે.
