સ્થાનિક સ્વરાજ્યની ચૂંટણી પહેલાં જ વોર્ડ નં. 5 માં ભડકો; નવા ચહેરાઓને સ્થાન મળતા પાયાના કાર્યકરોમાં ભારે રોષ, સોશિયલ મીડિયા પર નારાજગી વહેતી થઈ
વડોદરા: સ્થાનિક સ્વરાજ્યની ચૂંટણીઓના પડઘમ વાગી રહ્યા છે ત્યારે વડોદરા ભારતીય જનતા પાર્ટીમાં ટિકિટ વહેંચણીને લઈને આંતરિક અસંતોષ સપાટી પર આવ્યો છે. ભાજપ દ્વારા વોર્ડ લક્ષી ઉમેદવારોની યાદી જાહેર કરવામાં આવતા જ અનેક વિસ્તારોમાં કાર્યકરો અને આગેવાનોમાં નારાજગી જોવા મળી રહી છે. ખાસ કરીને વડોદરાના વોર્ડ નંબર ૫ માં ભાજપના પૂર્વ પ્રમુખ દ્વારા કરવામાં આવેલી એક સોશિયલ મીડિયા પોસ્ટ હાલ સમગ્ર શહેરમાં ચર્ચાનો વિષય બની છે અને રાજકીય ગરમાવો લાવી દીધો છે.
પ્રાપ્ત વિગતો અનુસાર, વોર્ડ નંબર ૫ ના ભાજપના પૂર્વ પ્રમુખે પોતાની નારાજગી વ્યક્ત કરવા માટે સોશિયલ મીડિયાનો સહારો લીધો છે. તેમણે પોતાની પોસ્ટમાં સ્પષ્ટ શબ્દોમાં લખ્યું છે કે, “મારું ઘર ભાજપનું ઘર છે, પણ કોઈએ ઘરે આવવું નહીં.” આ પ્રકારની તીખી પ્રતિક્રિયાએ પક્ષની અંદર ચાલતા આંતરિક વિખવાદને જાહેરમાં લાવી દીધો છે. પૂર્વ પ્રમુખની આ પોસ્ટ પાછળનું મુખ્ય કારણ ભાજપ દ્વારા આ વખતે સ્થાનિક સ્તરે કરવામાં આવેલા ફેરફારો અને નવા ચહેરાઓને આપવામાં આવેલી પ્રાધાન્યતા હોવાનું મનાઈ રહ્યું છે.
મહત્વનું છે કે, ભાજપ હાઈકમાન્ડ દ્વારા આ વખતે ચૂંટણીમાં જૂના જોગીઓને પડતા મૂકીને અનેક વોર્ડમાં નવા અને યુવા ચહેરાઓને મેદાનમાં ઉતારવામાં આવ્યા છે. પક્ષના આ ‘નો રિપીટ’ અથવા નવા પ્રયોગોને કારણે વર્ષોથી પક્ષ માટે પાયાનું કામ કરતા જૂના કાર્યકરોમાં ભારે રોષ જોવા મળી રહ્યો છે. અસંતુષ્ટ કાર્યકરોનું માનવું છે કે પાયાના કાર્યકરોની અવગણના કરીને લેવાયેલા આ નિર્ણયો આગામી સમયમાં પક્ષ માટે મુશ્કેલી ઊભી કરી શકે છે.
ચૂંટણીના માહોલ વચ્ચે જ્યારે ઉમેદવારો પ્રચાર માટે નીકળવાની તૈયારી કરી રહ્યા છે, ત્યારે પૂર્વ પ્રમુખ જેવા જવાબદાર હોદ્દેદારની આવી પોસ્ટ ભાજપ માટે ચિંતાનો વિષય છે. ‘ઘરે આવવું નહીં’ એવો સ્પષ્ટ ઇનકાર સૂચવે છે કે નારાજગી ઘણી ઊંડી છે, જેની સીધી અસર ચૂંટણીના મતદાન અને પરિણામો પર પડી શકે છે. હવે જોવાનું એ રહેશે કે ભાજપના મોવડી મંડળ દ્વારા આ અસંતુષ્ટ કાર્યકરોને મનાવવા માટે કેવા પ્રયાસો કરવામાં આવે છે અને મતદારો આગામી ચૂંટણીમાં કયા પક્ષ પર પસંદગીનો કળશ ઢોળે છે. હાલ તો આ વાયરલ પોસ્ટ વડોદરાના રાજકારણમાં હોટ ટોપિક બની રહી છે.
