ખુલ્લા ખોરાક બાદ હવે તો પેક્ડ ફૂડમાં પણ જીવ જંતુઓ નીકળતા થયા :
આ વીડિયો કારેલીબાગ વિસ્તારમાં આવેલા આઉટલેટનો હોવાનું પ્રાથમિક અનુમાન લગાવાયું :
( પ્રતિનિધિ )વડોદરા,તા.16
રાજ્યભરમાં જાણીતી KabhiB બેકરીની પેક્ડ બ્રેડમાંથી કીડા ફરતા હોવાનું સપાટી પર આવ્યું છે. જેના કારણે લોકોએ હવે સાવધાની રાખવાની જરૂર રાખવી પડે તેમ છે. આ વીડિયો સોશિયલ મીડિયામાં સામે આવ્યો છે. પેક્ડ ખાદ્ય પદાર્થ હોય કે પછી બનાવીને પીરસવામાં આવેલા ખાદ્ય પદાર્થ હોય બંનેમાં જીવ જંતુઓ નીકળવાની ઘટનાઓ ચિંતાજનક રીતે સપાટી પર આવી રહી છે. જેને નાથવામાં ફૂડ એન્ડ સેફ્ટી વિભાગનું તંત્ર સદંતર નિષ્ફળ નીવડ્યું છે.
વડોદરા સહિત રાજ્યભરમાં ગ્રાહકો અને કોમર્શિયલ એકમોની પહેલી પસંદ પામેલી KabhiB બેકરીની બ્રેડમાં કીડા ફરતા હોવાનું સપાટી પર આવ્યું છે. સામાન્ય સંજોગોમાં ખુલ્લા ખોરાકમાં આ પ્રકારે કીડા ફરતા હોય તેવું સપાટી પર આવતું હોય છે. હવે તો પેક્ડ ફૂડ ખરીદતા ગ્રાહકોને પણ આ વાતનો અનુભવ થઇ રહ્યો છે. સોશિયલ મીડિયા માધ્યમથી સપાટી પર આવેલો વીડિયો વડોદરાના કારેલીબાગ વિસ્તારમાં આવેલા આઉટલેટનો હોવાનો પ્રાથમિક અંદાજ છે. આ બ્રેડ ગાર્લિક લોફ પ્રકારની હોવાનો ઉલ્લેખ તેના પર છે, તેની એક્સપાયરી ડેટ 18 માર્ચ લખવામાં આવી છે. આ પ્રોડક્ટ KANHAI FOODS LTD દ્વારા તૈયાર કરવામાં આવ્યું હોવાનું સ્ટીકર પર લખ્યું છે. આ વીડિયો સામે આવતાની સાથે જ ફૂડ એન્ડ સેફ્ટી વિભાગના તંત્રની પોલ ખુલ્લી થવા પામી છે. અગાઉ સામે આવેલા કિસ્સાઓમાં કડકાઇ દાખવી હોત તો આજે આ દિવસ આવ્યો નાહોત તેવું લોકોનું માનવું છે. સામાન્ય રીતે સીઝનલ ધંધો કરતા વેપારીઓ પર ફૂડ સેફ્ટી વિભાગના અધિકારીઓ અવાર-નવાર ચેકીંગ કરતા હોય છે. અને પેક્ડ ફૂડ વેચતા વિક્રેતાઓ પર સામાન્ય સંજોગોમાં ઓછી કાર્યવાહી થતી હોય છે. જેના કારણે છાશવારે આવા કિસ્સાઓ સપાટી પર આવતા હોય છે.
