( પ્રતિનિધિ )વડોદરા,તા.21
વડોદરાના તરસાલી વિસ્તારમાં આવેલ સોમનાથ નગર સોસાયટીમાં મકાન નંબર એ -258 માં આગ લાગી હતી. જેમાં ઘરવકરીનો સામાન આગમાં બળીને ખાક થઈ ગયો હતો. મકરપુરા જીઆઇડીસીના ફાયરબ્રિગેડના જવાનો ઘટના સ્થળે પહોંચી પાણીનો મારો ચલાવી આગને કાબુમાં લીધી હતી. સદનસીબે કોઈ જાનહાનિ થઈ ન હતી.
તરસાલી સોમનાથ નગરના મકાનમાં આગની ઘટના મામલે મકાન માલિક સંદીપભાઈ રાવલે માહિતી આપતા જણાવ્યું હતું કે આજે બપોરે અઢી વાગ્યાની આસપાસ હું નોકરી પર જતો હતો અને મારી માતા નો ફોન આવ્યો હતો કે શોર્ટ સર્કિટ થયો છે. આગ લાગી છે. જેથી ફાયરબ્રિગેડને ફોન કર્યો હતો. અંદાજિત દોઢથી અઢી લાખ રૂપિયા જેટલું નુકસાન થયું છે. એવી ઈચ્છા છે કે સરકાર તરફથી અમને થોડી સહાય મળે કારણ કે, અમારા મકાનનો કોઈ વીમો નથી. આગ કેવી રીતે લાગી એ હજી સુધી અમને ખબર નથી પડી. આ મામલે અમે ફરિયાદ કરી છે. સબ ફાયર ઓફિસરે જણાવ્યું હતું કે કંટ્રોલરૂમથી અમને કોલ મળ્યો હતો કે સોમનાથ નગર સોસાયટીમાં એ 258 નંબરનું મકાન છે એમાં આગ હતી જેવો જીઆઈડીસી ફાયર સ્ટેશનને કોલ મળતા અમે તત્કાલીક સ્થળે આવીને આગ કંટ્રોલ કરી લીધી છે. કોઈ પ્રકારની જાનહાની નથી. એવું પ્રાથમિક અહીંથી માહિતી મળેલ છે કે આ રૂમમાં આગ લાગી એટલે તે રૂમની આગને કંટ્રોલ કરી કુલિંગ કરી દીધી છે. આગ લાગવાનું કારણ એ તપાસનો વિષય છે તેનું કારણ જાણવા મળેલ નથી.
