સિકલીગર ગેંગના 5 આરોપીની ધરપકડ, 2 ફરાર, 1 ગોધરા જેલમાં
(પ્રતિનિધિ), વડોદરા | તા. 7
વડોદરા શહેર તેમજ આસપાસના જિલ્લાઓમાં છેલ્લા દસ વર્ષ દરમિયાન ઘરફોડ અને વાહન ચોરી સહિત કુલ 101 ગંભીર ગુનાઓ આચરનાર સિકલીગર ગેંગ સામે પોલીસે કડક કાર્યવાહી હાથ ધરી છે. જામીન પર છૂટ્યા બાદ પણ ફરી ફરી ગુનાઓ કરતા હોવાના કારણે ક્રાઇમ બ્રાન્ચે ગુજરાત કંટ્રોલ ઓફ ટેરરિઝમ એન્ડ ઓર્ગેનાઇઝ્ડ ક્રાઇમ એક્ટ, 2015 (GCTOC) એટલે કે ગુજસીટોક હેઠળ ગુનો નોંધી 5 આરોપીની ધરપકડ કરી છે.
ક્રાઇમ બ્રાન્ચના જણાવ્યા મુજબ, વડોદરા શહેર, આસપાસના વિસ્તારો તેમજ ગુજરાતના અન્ય જિલ્લાઓમાં રાત્રિના સમયે ટોળકી બનાવી ઘરફોડ અને વાહન ચોરીના ગુનાઓ આચરવામાં આવતા હતા. આ સંગઠિત ગુનાઓને ધ્યાનમાં લઈ આરોપીઓના ગુનાહિત ઇતિહાસની ઊંડાણપૂર્વક તપાસ કરવામાં આવી હતી. તપાસમાં સામે આવ્યું કે આરોપીઓ જામીન પર મુક્ત થયા બાદ પણ ગેરકાયદે પ્રવૃત્તિઓ ચાલુ રાખતા હતા, જેના પગલે ગુજસીટોક જેવા કડક કાયદાનો ઉપયોગ કરાયો છે.
આ મામલે ક્રાઇમ બ્રાન્ચના PI એચ.ડી. તુવર દ્વારા મકરપુરા પોલીસ સ્ટેશન ખાતે ગુનો નોંધાવવામાં આવ્યો છે, જેમાં સી-ડિવિઝનના ACP એ.પી. રાઠવા દ્વારા તપાસ શરૂ કરવામાં આવી છે.
📌 પકડાયેલા / સંડોવાયેલા આરોપીઓ
અજયસિંગ દર્શનસિંગ દુધાણી – (હાલ ગોધરા જેલમાં)
અર્જુનસિંગ ઉર્ફે કથ્થોડ દુધાણી – ધરપકડ
પ્રકાશ વિજયભાઇ રાજપૂત – ધરપકડ
સન્નીસિંગ દર્શનસિંગ દુધાણી – ધરપકડ
કરણસિંગ ઉર્ફે વિઠ્ઠલ દુધાણી – ધરપકડ
જશપાલસિંગ ઉર્ફે બચ્ચસિંગ દુધાણી – ફરાર
શમશેરસિંગ ઉર્ફે હબ્બસિંગ સીકલીગર – ફરાર
શંકર સોનુભાઇ મારવાડી – તપાસ હેઠળ
🔗 ગેંગના પરસ્પર સંબંધ
અજયસિંગ, અર્જુનસિંગ, સન્નીસિંગ અને કરણસિંગ – સગા ભાઈઓ
જશપાલસિંગ – ઉપરોક્ત ભાઈઓનો પિતરાઈ
શમશેરસિંગ – સિકલીગર ગેંગનો જાતિગત સગો
પ્રકાશ અને શંકર – ગેંગના સભ્યોના નજીકના મિત્ર
પોલીસે જણાવ્યું છે કે ફરાર આરોપીઓને ઝડપવા માટે વિશેષ ટીમો બનાવવામાં આવી છે. આ કાર્યવાહીથી વડોદરા અને આસપાસના વિસ્તારોમાં ગુનાખોરી પર અંકુશ લાવવાની દિશામાં મહત્વપૂર્ણ પગલું ભરાયું હોવાનું માનવામાં આવી રહ્યું છે.
