કોઈ વ્યક્તિ દ્વારા કૃત્ય કરાયું હોવાની માલિકને શંકા :
( પ્રતિનિધિ ) વડોદરા,તા.15
વડોદરા શહેરના કારેલીબાગ વિસ્તારમાં આવેલી પરાગ પાર્ક સોસાયટીમાં એક મકાન બહાર પાર્ક કરેલી વૈભવી કાર માં અચાનક આગ લાગી હતી. ફાયર બ્રિગેડના જવાનો એ ઘટના સ્થળે પહોંચી આગ ઉપર કાબુ મેળવ્યો હતો.
વડોદરા શહેરમાં છેલ્લા કેટલાક દિવસોથી આગ લાગવાના બનાવવામાં નોંધપાત્ર વધારો જોવા મળ્યો છે. શહેરમાં દરરોજ એક અલગ અલગ વિસ્તારમાંથી આગ લાગી હોવાનો કોલ સીટી કમાન્ડ એન્ડ કંટ્રોલ રૂમમાં મળી રહ્યો છે. તેવામાં શુક્રવારે વધુ એક આગની ઘટના બની હતી. શહેરના કારેલીબાગ વિસ્તારમાં પરાગ પાર્ક સોસાયટીમાં એક કારમાં એકાએક ભીષણ આગ લાગી હતી.
કારેલીબાગ અંબાલાલ પાર્ક પાસે આવેલ પરાગ પાર્ક સોસાયટીના એક મકાન બહાર પાર્ક કરેલી વૈભવી કારમાં અચાનક આગ લાગતા આ કાર બર્નિંગિં કાર બની હતી. આગે વિકરાળ સ્વરૂપ ધારણ કરતા સોસાયટીના અન્ય લોકોમાં પણ ફફડાટ ફેલાયો હતો. બનાવની જાણ થતા ફાયબ્રિગેડના જવાનો ઘટના સ્થળે પહોંચ્યા હતા અને આગ ઉપર કાબુ મેળવ્યો હતો. પ્રાથમિક તપાસમાં શોર્ટ સર્કિટને કારણે આગ લાગી હોવાનું અનુમાન લગાવાયું છે. જ્યારે ગાડી માલિકનું કોઇક વ્યક્તિએ આ કૃત્ય કર્યું હોવાનું માનવું છે. ફાયર બ્રિગેડના કર્મચારીએ જણાવ્યું હતું કે, ગાડી ટોટલ લોસ થઈ ગઈ છે. પેટ્રોલ ની ટાંકી પણ લીકેજ હતી. ફોર્મનો મારો ચલાવીને આગ ઉપર કાબુ મેળવી લેવામાં આવ્યો છે.
