વડોદરા બનશે સ્ટાર્ટઅપ અને બિઝનેસ હબ: બજેટમાં એરપોર્ટ વિસ્તરણ અને આઈ-હબ રિજનલ સેન્ટરની ભેટ
મધ્ય ગુજરાત માટે ‘ઈકોનોમિક માસ્ટર પ્લાન’ જાહેર; ફ્લાયઓવર નીચે રમતગમતની સુવિધાઓ અને નવી શાળાઓથી વડોદરા સજ્જ થશે
વડોદરા: ગુજરાત રાજ્યના નાણામંત્રી કનુભાઈ દેસાઈ દ્વારા રજૂ કરવામાં આવેલા વર્ષ 2026-27 ના અંદાજપત્રમાં વડોદરા શહેર અને જિલ્લાના આધુનિકીકરણ અને આર્થિક વિકાસ માટે મહત્વની ફાળવણી કરવામાં આવી છે. રાજ્ય સરકારે વડોદરાને એજ્યુકેશન અને ઇનોવેશન હબ તરીકે વિકસાવવા માટે સ્પષ્ટ રોડમેપ રજૂ કર્યો છે.
વડોદરાના યુવાનો અને ઉદ્યોગ સાહસિકો માટે સૌથી મોટી જાહેરાત i-Hubના રિજનલ સેન્ટરની સ્થાપના છે. અમદાવાદમાં સફળતાપૂર્વક કાર્યરત i-Hub મોડલને વડોદરામાં વિસ્તરણ કરવા માટે 80 કરોડની જોગવાઈ કરવામાં આવી છે. આ કેન્દ્ર વડોદરાની વિવિધ યુનિવર્સિટીઓના વિદ્યાર્થીઓને નવા સંશોધન અને વ્યવસાય શરૂ કરવા માટે ટેકનિકલ અને નાણાકીય માર્ગદર્શન પૂરું પાડશે.
વડોદરા એરપોર્ટની ક્ષમતા વધારવા અને માળખાગત સુવિધાઓના વિસ્તરણ માટે બજેટમાં 95 કરોડની જોગવાઈ કરવામાં આવી છે. આ પ્રોજેક્ટ હેઠળ રનવેની સુવિધા અને પેસેન્જર ટર્મિનલના વિસ્તરણની કામગીરી હાથ ધરાશે, જેની સીધી અસર શહેરના પ્રવાસન અને વેપાર પર પડશે.
વડોદરા સહિત મધ્ય ગુજરાતના સર્વાંગી વિકાસ માટે ‘ઇકોનોમિક માસ્ટર પ્લાન’ તૈયાર કરાયો છે. આ અંતર્ગત વડોદરા જિલ્લામાં નવા ઔદ્યોગિક ક્લસ્ટરો અને રોજગારીની તકો ઊભી કરવા માટે 2000 કરોડના મોટા પ્રોજેક્ટ્સનું અમલીકરણ કરવામાં આવશે. આ બજેટ વડોદરાને પરંપરાગત ઔદ્યોગિક શહેરથી આગળ વધારીને એક હાઈ-ટેક ‘નોલેજ સિટી’ તરીકે સ્થાપિત કરવામાં મહત્વની ભૂમિકા ભજવશે.
– શહેરી સુવિધા અને સ્પોર્ટ્સ ઇન્ફ્રાસ્ટ્રક્ચર
શહેરી વિકાસ વિભાગ દ્વારા વડોદરા મહાનગરપાલિકા વિસ્તાર માટે નીચે મુજબની જોગવાઈઓ કરવામાં આવી છે:
*MICE ઇન્ફ્રાસ્ટ્રક્ચર: વડોદરામાં આંતરરાષ્ટ્રીય સ્તરની કોન્ફરન્સ અને એક્ઝિબિશન યોજવા માટે MICE સુવિધાઓ ઊભી કરવામાં આવશે, જેના માટે 100 કરોડ ફાળવાયા છે.
*રમતગમત: શહેરના યુવાનો માટે નવા સ્પોર્ટ્સ કોમ્પ્લેક્સ બનાવવામાં આવશે. આ ઉપરાંત, શહેરના ફ્લાયઓવર નીચે ખાલી પડેલી જગ્યાઓમાં સ્પોર્ટ્સ ઇન્ફ્રાસ્ટ્રક્ચર વિકસાવવા માટે 150 કરોડની જોગવાઈ છે.
*નગર નવજીવન: વડોદરાના જૂના વિસ્તારો અને ગીચ વસ્તીવાળા વિસ્તારોમાં પાયાની સુવિધાઓ સુધારવા માટે ‘મુખ્યમંત્રી નગર નવજીવન યોજના’ હેઠળ 100 કરોડની ફાળવણી થઈ છે.
અન્ય મહત્વના બિંદુઓ:
*સ્વર્ણિમ જયંતિ મુખ્યમંત્રી શહેરી વિકાસ યોજના હેઠળ વડોદરામાં રસ્તા, પાણી અને ગટર વ્યવસ્થાના આધુનિકીકરણ માટે મસમોટી ગ્રાન્ટ ફાળવવામાં આવી છે.
*જિલ્લાના ગ્રામ્ય વિસ્તારોમાં આરોગ્ય સુવિધાઓ માટે નવી એમ્બ્યુલન્સ અને ધન્વંતરિ રથની સંખ્યા વધારવામાં આવશે.
*PM શ્રી યોજના અંતર્ગત વડોદરા જિલ્લાની પસંદગીની શાળાઓને હાઈ-ટેક લર્નિંગ સુવિધાઓથી સજ્જ કરવામાં આવશે.
