તા. 28-02-2026
સ્થાયી સમિતિ અધ્યક્ષ ડૉ. શીતલભાઈ મિસ્ત્રીએ માહિતી આપતા જણાવ્યું હતું કે આજરોજ માનનીય વડાપ્રધાન નરેન્દ્રભાઈ મોદીએ અજમેર ખાતેથી તથા માનનીય મુખ્યમંત્રી ભુપેન્દ્રભાઈ પટેલે સોલા ખાતેથી હ્યુમન પેપિલોમાવાયરસ (HPV) રસીકરણ રાષ્ટ્રીય અભિયાનનો પ્રારંભ કર્યો છે.
વર્ષ 2022ના આંકડા મુજબ ગર્ભાશયના મુખનું કેન્સર ભારતમાં મહિલાઓમાં થતા કેન્સરમાં બીજા ક્રમે છે. દેશમાં આશરે 79,103 નવા કેસ અને 34,805 મૃત્યુ નોંધાયા હતા.
ડૉ. મિસ્ત્રીએ વધુમાં જણાવ્યું કે આ અભિયાન અંતર્ગત વડોદરા શહેરમાં અંદાજે 15,033 કિશોરીઓને આવરી લેવાનો લક્ષ્યાંક નક્કી કરવામાં આવ્યો છે. પ્રારંભિક તબક્કામાં શહેરના 40 અર્બન પ્રાથમિક આરોગ્ય કેન્દ્રો (U-PHC) ખાતે તા. 02-03-2026, સોમવારના રોજ રસીકરણ સત્રો યોજાશે. આ કામગીરી માટે 142 એ.એન.એમ. અને 67 સ્ટાફ નર્સની નિમણૂક સાથે સુવ્યવસ્થિત આયોજન કરવામાં આવ્યું છે.
હાલમાં વડોદરા શહેરને કુલ 4,647 HPV રસીના ડોઝ પ્રાપ્ત થયા છે. 01-01-2011 થી 29-02-2012 વચ્ચે જન્મેલી લગભગ 14 વર્ષની કિશોરીઓને આ રસી આપવામાં આવશે. હેડ કાઉન્ટ સર્વે દ્વારા લાભાર્થીઓની ઓળખ કરવામાં આવશે.
રસીકરણ બાદ કિશોરીઓને 30 મિનિટ સુધી નિરીક્ષણ હેઠળ રાખવામાં આવશે. Adverse Event Following Immunization (AEFI) કિટ તમામ સત્ર સ્થળે ઉપલબ્ધ રહેશે. વધુ માહિતી માટે નાગરિકો 24×7 હેલ્પલાઇન નંબર 104 પર સંપર્ક કરી શકશે. અભિયાનનો સમયગાળો 3 મહિના (90 દિવસ) રહેશે.
વડોદરા મહાનગરપાલિકા દ્વારા સોમવારથી તમામ અર્બન પ્રાથમિક આરોગ્ય કેન્દ્રોમાં સવારે 10:00 વાગ્યાથી નિયમિત રસીકરણ કામગીરી શરૂ કરવામાં આવશે. શહેરની તમામ લક્ષિત કિશોરીઓ અને તેમના વાલીઓને આ અભિયાનમાં સક્રિય સહભાગી થવા અધ્યક્ષ ડૉ. શીતલભાઈ મિસ્ત્રીએ વિનંતી કરી છે.
