નેટ-ઝીરો અભિયાન હેઠળ ₹4.93 કરોડનું આયોજન; શહેરીજનોને હરવા-ફરવા સાથે ફ્રી ચાર્જિંગ અને બેઠક વ્યવસ્થાની અનોખી ભેટ મળશે
વડોદરા: સ્વચ્છ અને નવીનીકરણીય ઉર્જાને પ્રોત્સાહન આપવા માટે વડોદરા મહાનગરપાલિકા દ્વારા એક નવતર પ્રયોગ હાથ ધરવામાં આવ્યો છે. વડોદરાના શહેરી અને સીમાડાના વિસ્તારોમાં ‘નેટ ઝીરો’ ઉપક્રમ હેઠળ કુલ 25 જેટલા મહત્વના સ્થળોએ આધુનિક ‘સોલર ટ્રી’ સ્થાપિત કરવાનો નિર્ણય લેવામાં આવ્યો છે. આ પ્રોજેક્ટ માટે કોર્પોરેશન દ્વારા અંદાજિત રૂ. 4.93 કરોડના ખર્ચ સાથે વર્ક ઓર્ડર પણ આપી દેવામાં આવ્યો છે.
VMCના ફ્યુચરિસ્ટિક પ્લાનિંગ સેલ વિભાગ દ્વારા આ પ્રોજેક્ટનું આયોજન કરવામાં આવ્યું છે. સોલર ટ્રી એટલે એક એવું માળખું જે દેખાવમાં વૃક્ષ જેવું હશે, પરંતુ તેના પર સોલર પેનલ્સ લાગેલી હશે. આ પેનલ્સ દ્વારા સૂર્યપ્રકાશમાંથી વીજળી ઉત્પન્ન કરવામાં આવશે. શહેરના મુખ્ય સર્કલો, તળાવો અને બગીચાઓમાં આ ટ્રી લગાડવામાં આવશે, જેમાં કાલાઘોડા સર્કલ જેવા પ્રખ્યાત સ્થળોનો પણ સમાવેશ થાય છે.
આ સોલર ટ્રી માત્ર વીજળી ઉત્પન્ન કરવા પૂરતું મર્યાદિત નહીં રહે, પરંતુ નાગરિકો માટે બહુવિધ સુવિધાઓ પણ પૂરી પાડશે, સોલર ટ્રીની નીચે ગઝેબો સ્ટાઈલમાં સુંદર બેઠક વ્યવસ્થા કરવામાં આવશે, જ્યાં શહેરીજનો આરામ કરી શકશે. નાગરિકો પોતાના મોબાઈલ કે અન્ય ગેજેટ્સ ચાર્જ કરી શકે તે માટે ત્યાં ચાર્જિંગ પોઈન્ટ્સની સુવિધા પણ આપવામાં આવશે. આ ટ્રી શહેરની સુંદરતામાં વધારો કરશે અને રાત્રિના સમયે આકર્ષણનું કેન્દ્ર બનશે.
આ સોલર ટ્રીમાંથી જે વીજળી ઉત્પન્ન થશે તેનો ઉપયોગ સ્ટ્રીટ લાઈટ કે જાહેર સુવિધાઓ માટે કરવામાં આવશે, જેનાથી કોર્પોરેશનના વીજ બિલમાં પણ ઘટાડો થશે.
વડોદરા મ્યુનિસિપલ કોર્પોરેશનના અધિકારીઓના જણાવ્યા અનુસાર, આ પ્રોજેક્ટનો મુખ્ય ઉદ્દેશ્ય કાર્બન ફૂટપ્રિન્ટ ઘટાડવાનો અને વડોદરાને ‘નેટ ઝીરો’ સિટી તરફ લઈ જવાનો છે. પ્રારંભિક તબક્કે 25 સ્થળોની પસંદગી કરવામાં આવી છે અને આગામી સમયમાં જરૂરિયાત મુજબ આ સંખ્યામાં વધારો કરીને શહેરના અન્ય ભાગોમાં પણ આ પ્રોજેક્ટ વિસ્તારવામાં આવશે.
– ક્યાં ક્યાં જોવા મળશે આ ‘સોલર ટ્રી’?
વડોદરા મહાનગરપાલિકા દ્વારા શહેરના મુખ્ય આકર્ષણો અને ટ્રાફિક ધરાવતા વિસ્તારોની પસંદગી કરવામાં આવી છે. જેમાં મુખ્યત્વે:
*ઐતિહાસિક સ્થળો: કાલાઘોડા સર્કલ જેવા પ્રખ્યાત જંકશન.
*જાહેર બગીચાઓ: શહેરના મુખ્ય ગાર્ડન્સ જ્યાં સવાર-સાંજ નાગરિકોની અવરજવર વધુ હોય છે.
*તળાવોના કિનારે: શહેરના બ્યુટિફિકેશન પામેલા તળાવોની આસપાસ.
*મુખ્ય ટ્રાફિક સર્કલો: શહેરના પ્રવેશદ્વાર સમાન અને સીમા વિસ્તારોના સર્કલો.
