મતદાર યાદીમાં નામની પુષ્ટિ કરવા ઉમેદવારોની દોડધામ: 250 અરજીઓમાંથી 100 પ્રમાણપત્રો ઇશ્યુ કરાયા
વડોદરા મહાનગરપાલિકાની વર્ષ 2026ની સામાન્ય ચૂંટણીની જાહેરાત થતાની સાથે જ શહેરના રાજકીય તાપમાનમાં ધરખમ વધારો થયો છે. ખાસ કરીને વોર્ડ સ્તરે ચૂંટણી લડવા ઈચ્છતા ઉમેદવારોમાં હવે ડોક્યુમેન્ટેશનને લઈને ભારે દોડધામ જોવા મળી રહી છે. શનિવારે વહેલી સવારથી જ શહેરની ચૂંટણી શાખા કચેરી ખાતે દાવેદારો અને તેમના સમર્થકોની ભીડ જામી હતી. ઉમેદવારી ફોર્મ ભરવા માટે અનિવાર્ય એવા ‘મતદાર હોવાના પ્રમાણપત્ર’ મેળવવા માટે દાવેદારો કલાકો સુધી કતારમાં ઉભા રહેલા જોવા મળ્યા હતા.
ચૂંટણી નિયમો મુજબ, કોઈપણ દાવેદારે જે તે વોર્ડમાં ઉમેદવારી નોંધાવવા માટે પોતે તે વિસ્તારના નોંધાયેલા મતદાર હોવાનો પુરાવો રજૂ કરવો પડે છે. આ વખતે મહાનગરપાલિકાની 2026ની મૂળ અથવા પુરવણી મતદાર યાદીમાં સંબંધિત વોર્ડના વિભાગ નંબર 5 માં નામ નોંધાયેલું હોય તેવા દાવેદારોને આ ખાસ પ્રમાણપત્ર આપવામાં આવી રહ્યું છે. આ પ્રમાણપત્રને કારણે ચૂંટણી અધિકારીઓ ઉમેદવારના નામની ચકાસણી ઝડપથી કરી શકશે અને ફોર્મ રદ થવાની શક્યતા નહિવત રહેશે.
ચૂંટણી વિભાગના સૂત્રોના જણાવ્યા અનુસાર, કામગીરીનું ભારણ વધતા સ્ટાફની સંખ્યામાં પણ વધારો કરવામાં આવ્યો છે. અત્યાર સુધીમાં અંદાજે 250 થી વધુ દાવેદારોએ આ સર્ટિફિકેટ માટે અરજી કરી છે, જેમાંથી વહીવટી પ્રક્રિયા પૂર્ણ કરીને 100 જેટલા પ્રમાણપત્રો સફળતાપૂર્વક ઇશ્યુ કરી દેવામાં આવ્યા છે. બાકીની અરજીઓની ચકાસણી યુદ્ધના ધોરણે ચાલી રહી છે. નોમિનેશનની પ્રક્રિયા પૂર્ણ થાય ત્યાં સુધી આ કામગીરી અવિરત ચાલુ રાખવાનો નિર્ણય લેવાયો છે.
એક તરફ વહીવટી તંત્ર સજ્જ થયું છે, તો બીજી તરફ ભાજપ, કોંગ્રેસ અને આમ આદમી પાર્ટી જેવા મુખ્ય પક્ષોમાં ટિકિટ મેળવવા માટે દાવેદારો લોબિંગ કરી રહ્યા છે. જે દાવેદારોના નામ સંભવિત યાદીમાં છે, તેઓએ કોઈ પણ કાયદાકીય અડચણ ન આવે તે માટે અત્યારથી જ જરૂરી દસ્તાવેજો એકઠા કરવાનું શરૂ કરી દીધું છે. ખાસ કરીને ઓબીસી અનામતની નવી જોગવાઈઓ અને વોર્ડ સીમાંકનને જોતા દાવેદારો કોઈ પણ જોખમ લેવા માંગતા નથી.
જેમ જેમ ઉમેદવારી ફોર્મ ભરવાની છેલ્લી તારીખો નજીક આવશે, તેમ તેમ VMC કચેરીમાં દાવેદારોનો ધસારો વધવાની પૂરેપૂરી શક્યતા છે. શનિવારે રજાના માહોલ છતાં ચૂંટણી શાખામાં જોવા મળેલી ગીર્દી સૂચવે છે કે આગામી સપ્તાહ વડોદરાના રાજકારણ માટે અત્યંત વ્યસ્ત રહેવાનું છે.
