વગર વરસાદે મેડિકલ કોલેજ સામે પાણીની નદીઓ વહી, દર્દીઓના સગાને હાલાકી
(પ્રતિનિધિ), વડોદરા. તા.18
વડોદરાની સયાજી હોસ્પિટલ ફરી એકવાર વિવાદોમાં સપડાઈ છે. મધ્ય ગુજરાતની સૌથી મોટી સરકારી હોસ્પિટલમાં તંત્રની ગંભીર બેદરકારી સામે આવી છે. આજે સયાજી હોસ્પિટલ કેમ્પસમાં મેડિકલ કોલેજની સામેના રોડ પર વગર વરસાદે પીવાના પાણીની નદીઓ વહેતી હોય તેવા દ્રશ્યો સર્જાયા હતા. હજારો લીટર પીવાનું ચોખ્ખું પાણી રસ્તા પર વેડફાયું હતું, જેના કારણે હોસ્પિટલમાં સારવાર માટે આવતા દર્દીઓ અને તેમના પરિવારજનોને ભારે હાલાકી ભોગવવી પડી રહી છે. હોસ્પિટલના મુખ્ય માર્ગો પર પાણી ભરાઈ જવાથી અવરજવર કરતા લોકોએ પાણીમાંથી પસાર થવા મજબૂર બનવું પડ્યું છે. એક તરફ રાજ્ય સરકાર પાણી બચાવવાના અભિયાન ચલાવે છે, ત્યારે બીજી તરફ સયાજી હોસ્પિટલના ઉંબરે જ પાણીનો આટલો મોટો બગાડ તંત્રની ઊંઘ ઉડાડનારો છે. આ સમગ્ર પરિસ્થિતિ માટે હોસ્પિટલના અધિકારીઓ સીધી રીતે જવાબદાર હોવાનું મનાઈ રહ્યું છે. સ્થાનિકો અને દર્દીઓના સગાના જણાવ્યા અનુસાર, અધિકારીઓની નિષ્કાળજી અને મેન્ટેનન્સના અભાવે અવારનવાર આવી સમસ્યાઓ સર્જાય છે. વારંવાર રજૂઆતો છતાં આ અધિકારીઓ જાણે ઘોર નિદ્રામાં હોય તેમ કોઈ નક્કર કામગીરી કરવામાં આવતી નથી. દૂર-દૂરથી સારવાર માટે આવતા ગરીબ દર્દીઓના સ્વજનોએ રોષે ભરાઈને જણાવ્યું કે, અમે અહીં માંદગીમાં હેરાન થઈએ છીએ અને ઉપરથી આ તંત્રની બેદરકારીના લીધે અમારે પાણીમાં ચાલવું પડે છે. પીવાના પાણીનો આ રીતે બગાડ એ ગુનો છે. હવે જોવાનું એ રહે છે કે, આટલી મોટી બેદરકારી સામે આવ્યા બાદ હોસ્પિટલ તંત્ર કે ઉચ્ચ અધિકારીઓ જવાબદાર વિભાગ સામે કોઈ પગલાં ભરે છે કે પછી હંમેશની જેમ આ બાબતને પણ નજરઅંદાજ કરવામાં આવશે એ જોવું રહ્યું.
